Katapusang misa

Si Padre Ben maoy kura paruko nga nadestino sa barangay Santa Monica. Batan-on pa siya ug aktibo sa kalihukan sa simbahan. Gawas nga mapaubsanon, sayon siya duolon. Paglabay sa lima ka tuig, may hungihong nga ibalhin si Padre Ben sa laing parokya. Nasagmuyo ang mga parokyano ug nagkauyon nga mohimo og petisyon aron dili kini ibalhin.

“Atong hangyuon ang kardinal nga magpabilin si Padre Ben dinhi,” sugyot ni Marcial nga presidente sa pastoral coundil.

“Bitaw. Anugon kay duna siyay proyekto nga wala pa mahuman,” dason ni Helen, sekretarya sa kapunongan.

Gidala ni Marcial ang ‘petition letter’ ngadto sa kardinal, apan gibalibaran kini, kay kinahanglan nga mo-serbisyo lang og lima ka tuig ang usa ka pari sa usa ka parokya una kini ibalhin.

Pag-abot sa adlaw nga mobalhin na si Padre Ben daghan ang nanghilak.

“Salamat sa inyong pag-suporta kanako. Kon mahimo pa lang, magpabilin ko dinhi,” ni Padre Ben nga mitulo ang luha nga nanamilit samtang nagmisa. Pagka human sa misa tagsa-tagsa nga gilamano niya ang mga nanimba.

Pagka sunod adlaw miabot ang bag-ong kura paruko nga gisugat sa mga parokyano.

“Kumusta mo dinhi sa parokya?” timbaya ni Padre Jay.

“Okey lang, Padre. Maayong pag-abot! Ako diay ang presidente sa parish pastoral council,” paila ni Marcial nga mi-amen sa pari.

Milabay ang duha ka tuig sukad nahimong kura paruko si Padre Jay. Daghang kausaban ang iyang gihimo. Daghan ang wala makauyon sa iyang pagdumala kay nasukwahi sa naandan nga pamaagi ang iyang gipatuman. May mga parokyano nga adto na manimba sa silingang lungsod ug adunay mibalhin sa laing relihiyon. Ang uban nawad-an og gana nga mosimba. Naglibog sila sa nagkalainlaing estilo sa matag pari nga nadestino sa ilang parokya.

Sa misa sa adlaw sa pista sa barangay mitambong ang obispo.

“Nganong gamay lang ang nanimba?” ni Bishop Marimat nga nahibulong human sa iyang pag-misa.

“Basin bisi sa ilang tagsa-tagsa ka panimalay,” ni Padre Jay.

Nagduda ang obispo sa gitug-an sa pari. Gipatawag niya si Marcial ug nahibaw-an niya ang hinungdan. Iyang gi-rekomendar sa kardinal nga pailisan si Padre Jay. Ang kardinal mipagawas og kamanduan nga ibalhin si Padre Jay sa laing parokya. Nalipay ang mga parokyano.

“Adunay katapusan misa karong Dominggo. Giawhag nako ang tanan nga mosimba,” ni Padre Jay samtang nag-wali.

Ang mga parokyano nagkahiusa nga dili motambong aron ipakita nga wala sila makauyon sa pagdumala ni Padre Jay sa parokya.

Sa adlaw nga Biyernes nasinati sa tibuok Sta. Monica ang kusog nga linog, diin nahugno ang simbahan ug daghang kabalayan. Nahadlok ang mga molupyo kay gisundan kinig kusog nga ‘afershock’ karon ug unya.

Pagka Dominggo gipahigayon ni Padre Jay ang katapusan niyang misa atubangan sa nahugnong simbahan. Mitambong ang tanang sakop sa parokya. Nagpasalamat sila nga naluwas sa katalagman.

“Bisag managlahi ang atong prinsipyo kita nagkahiusa karong buntaga tungod sa atong pagtuo ug pagsalig sa Diyos,” ni Padre Jay.

Natandog ang mga pagbati sa kadaghanan samtang naminaw sa wali. Ang uban wala makapugong sa ilang mga luha.

Human sa misa nanamilit si Padre Jay. “Goodbye, Sta. Monica!” tuaw niya nga nagsubo tungod sa iyang pagbalhin. Apan nalipay siya nga nagsudong sa tanang nanambong kay wala maapil sa pagkahugno sa simbahan ang ilang pagtuo ug pagsalig sa Diyos.

(KATAPUSAN)