KRUSYAL NGA DUWA
Human napusgay ang ilang tinguha nga maangkon ang benepisyo nga magtukmod unta kanila deretso sa finals, ang University of Cebu (UC) Webmasters manikaysikay na lang sa laing misyon – seguradong luna sa top two.
Suwayan kini pagkaplag sa Webmasters sa ilang pagpakigbatok sa University of Southern Philippines Foundation (USPF) Panthers sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum. Ang Webmasters gikan sa makapakurat nga kapildihan batok sa nagkagidlay nga Cebu Institute of Technology University (CITU) Wildcats, 75-81, niadtong Sabado nga maoy nakahugaw sa ilang rekord, 8-1.
Sa wala pa sila napukan sa Wildcats, ang Webmasters nagtinguha unta nga makahuman sa double-round elimination dala ang perpektong 12-0 nga rekord nga nagtangag og benepisyo nga deretsong pagsulod sa finals.
Apan angayan na kining kalimtan sa Webmasters ug magtutok na lang sa laing direksyon paingon sa top 2, nga nagtangag og twice-to-beat nga bintaha sa semi-finals.
Nagpabilin man tuod sila sa liderato apan ning puntoha, delikado pang modakin-as sa mga kamot sa Webmasters ang luna sa top 2 kon mapilde sila sa katapusan nilang tulo ka mga duwa gikan ning kombatiha.
Kinahanglang modaog ang Webmasters ning duwaa gumikan kay lig-ong mga puwersa ang nag-atang sa katapusan nilang duha ka mga tahas, ang University of San Jose Recoletos (USJ-R) Jaguars ug defending
champions University of the Visayas (UV) Green Lancers.
Ang Jaguars ug Green Lancers, nga pulos adunay 6-3 nga rekord, mao na lang ang nahabiling mga karibal sa Webmasters sa inilugay sa top 2.
Sa habig sa Panthers, nga kasamtangang naa sa ikaupat nga luna dala ang 5-5 nga rekord, grabe sab ka importante alang kanila nga modaog ning sangkaa aron paamagon ang ilang poruhan nga makasulod sa semi-finals sa labing unang higayon.
Sa laing bahin, ang Green Lancers manikaysikay sab alang sa ilang tinguha nga makabaton og luna sa top 2 sa ilang pagpakigbatok Wildcats sa premirong duwa.
Kon buot hunahunaon, makonsiderar nga grabe ka inilog ang Green Lancers batok sa Wildcats apan dili sila angayang molugak bisan gamay aron dili nila masinati ang nasinati sa Webmasters.
Gilaumang mokombati ang Wildcats nga wala’y pressure bisan gamay tungod kay wala may mawala kanila kon mapilde sila ning sangkaa ug dako ang ilang makuhang moral kon modaog.
Bitbit ang 2-7 nga rekord, wa na’y paglaom ang Wildcats nga makasud sa semis.