World title fight alang kang Dave

Mandaluyong, Manila - Dili regional title, kon dili usa gyud ka regular world title maoy target ni kanhi world champion Gerry Penalosa nga iyang han-ayon alang sa iyang pag-umangkon ug undefeated nga si Dave Penalosa.

Kini maoy gitino ni Penalosa, chief executive sa GerPenz Promotion, human sa impresibong knockout nga kadaugan ni Dave niadtong Dominggo batok sa Tanzanian fighter nga si Twalib Tuwa sa main event sa ESPN5 boxing promotion nga gipahigayon sa Skydome sa SM City-North Edsa.

Sa ilang 10-round non-title fight ang kanhi Tanzanian featherweight champion maayong pagkahagba sa first

round human maigo sa mga solidong kumo ni Dave ug wala na makabangon human kini maiphi sa referee.

Ang 27-anyos, sa interview, mipadayag nga ang pag-away alang sa regional title maoy iyang tinguha sa sunod niyang pagsaka sa ring. Apan sa linahi nga interview, si Gerry mibutyag nga iyang pakighinabian ang mga world boxing

bodies sa posibling regular

title fight alang sa iyang pagumangkon. “Atong istoriyahon bisan asa nga world boxing bodies – WBA, WBC o IBF – kon puwede ba si Dave makaaway para sa regular world tiltle,” matod ni Gerry kinsa kaabag na karon sa ESPN5 sa boxing promotions.

Sa kadaugan, si Dave pabiling way pildi sa 14 ka away ug aduna na karoy 11 ka knockout.

Matod ni Gerry nga sa sayong bahin sa sunod tuig gikatakda ang sunod away sa anak sa iyang anak sa iyang igsuon nga si kanhi world champion

Dodie Boy Penalosa.