LEBRON, LAKERS NAPUKAN APAN...
Nasubhan man tuod og kapildihan si LeBron James isip bag-ong sakop sa Los Angeles Lakers sa pre-season sa National Basketball Association (NBA) apan ang iyang presensya igo na aron maghatag og kalipay ug bag-ong paglaom alang sa multi-titled nga puwersa.
Sa wala pa nagsugod ang ilang duwa batok sa Denver Nuggets kagahapon sa San Diego, ang four-time MVP nihimo na sab sa iyang naandang gimbuhaton diin nanghunaw siya og chalk powder dayong sabwag niini sa hangin ug misinggit og “Yes!” Sa maong gipakita ni James, tataw ang kahinam sa mga sumosunod sa Lakers nga mahibalik na ang kasadya sa ilang kampo nga sulod na sab sa ubay-ubay nga katuigan nga wala nila nasinati tungod kay kanunay na lang dili kasulod sa playoffs ang team.
Pagkahuman sa duwa, nasugamak ang Lakers sa 107-124 nga kapildihan batok sa Nuggets apan wala kini nakaapekto sa kahinam sa ilang mga sumosunod.
Misugod si James sa duwa ug nasipyat siya sa labing una niyang itsa apan gibawi kini niya pinaagi sa wala’y tan-aw nga bounce pass ngadto kang Brandon Ingram alang sa usa ka hansak nga nakapaugyaw sa mga tumatan-aw.
Sama sa gilauman, limitado ra ang oras ni James, kinsa niamot og siyam ka mga puntos alang sa Lakers.
Si James mibiya sa Cleveland Cavaliers ug mipirma’g upat ka mga tuig nga kontrata sa Lakers nga nagbalor og $153.3 million.
Sa paghiabot ni James, nanghinaot ang mga sumosunod sa Lakers nga makabangon na ang ilang team gikan sa labing ngil-ad niining kasinatian sa miaging lima ka mga tuig.
Miduwa si James sa nagunang siyam ka mga minutos
sa 1st quarter una kini mipahuway ug gilauman nga dili na kini mobalik og duwa.
Apan sa wala damha, mibalik og duwa si James sa tungatungang bahin sa 2nd quarter diin giuwan siya og abiba.
“LeBron, we love you!” singgit sa usa ka tamatan-aw.
Si Lakers coach Luke Walton wala’y laing gikasulti kabahin kang James kon dili pulos mga pagdayeg.
“His intelligence. He sees everything. He knows even before drills. He knows where he’s going. His work ethic. He’s out there pre-practice with the guys, post-practice with the guys. Taking care of his body in the weight room,” paghulagway ni Walton kang James.
“He’s the ultimate professional.”
Ang Lakers mosugod sa ilang kampanya sa regular
season karong Oktubre 18 diin moasdang sila sa Portland Trailblazers.
Gawas ni James, ang Lakers ningkuha sab og laing mga beterano nga sila si Rajon Rondo, Javale McGee, Lance Stephenson ug Michael Beasley aron makatabang sa paggiya sa batan-on nilang mga sakop.
Sa laing bahin, nabunyagan si DeMar DeRozan og kadaugan isip bag-ong sakop sa San Antonio Spurs batok sa Miami Heat, 104-100.
Sa lain pang mga duwa, gipangsungag sa Chicago Bulls ang New Orleans Pelicans, 128-116, gipangpukan sa Boston Celtics ang Charlotte Hornets, 115-112, samtang gipangmakmak sa Los Angeles Clippers ang Sydnet Kings, 110-91.