Luna sa NRA gihimong garahe sa pribado nga bus company
Gihimong garahe sa usa ka private tourist bus company ang yuta sa Cebu City Government nga nahimutang sa North Reclamation Area (NRA)
Ang Superbalita Cebu nakadawat og report may labot sa mga bus sa SMB Tourist Transport nga giparada sulod sa block 27 sa NRA nga kanhi impounding area sa City Traffic Operation Management ( CITOM).
Ang maong yuta apil sa land swap sa 93-1 tali sa City Government ug Kapitolyo apan wala pa mahingpit ang pagbinayloay sa yuta.
Si Ronald Malacora, department head sa General Services Office (GSO), nagkanayon nga wala siya mahibawo nga gigamit sa private company ang parte sa block 27 ug niingon nga iya kining ipasusi.
Gawas sa bus company, nakita usab sa pagbisita sa Superbalita sa lugar mao ang nagtumpi nga container vans nga nahimutang pipila ka metros gikan sa giparadahan sa mga bus.
Anaa usab nahimutang ang planta sa WT construction.
Si konsehal Joel Garganera sa Barug PDP nagkanayon nga walay giaprobahan nga letter of authority ang konseho para sa mayor nga mopirma og memorandum of agreement tali sa private company nga tag-iya sa bus para gamiton ang yuta.
Si Garganera niingon nga kon walay mga dokumento nga nagsuporta sa paggamit sa maong propriyedad, hayan adunay tawo nga nagpaluyo niini.
Iyang gihulagway nga angayan manubag ang tawo nga responsabli sa pagpahimulos sa bahandi sa dakbayan.