Di maayong magdali

Dunay usa ka kompaniya sa Taiwan nga gustong moilis sa karaang traffic system sa siyudad sa Sugbo nga wa kunoy gasto ang Siyudad. Uban sa traffic lights imontar ang mga camera nga magamit sa pagpatuman sa no contact nga polisiya unya sa Cebu City Traffic Office (CCTO). Unsa may matampo niini sa grabeng suliran sa trapiko sa Dakbayan sa Sugbo? Mopaluag ba kini sa kadalanan sa siyudad nga gubot pa sa lukot ang kahimtang? O, mahimo ba lang kini nga band aid nga solusyon sa lapad ug lawom nga problema?

Tinuod kaha nga way magasto ang Siyudad niining mao nga traffic system? Kinsa may patuohon ni Konsehal Jerry Guardo? Kinsa mang tawhana o negusyante ang mobuhi og kwarta nga way mobalik kaniya nga ginansya? Bisan gani ang usa ka foundation nga non-profit mangita man gani og mga pamaagi aron mokita kay gikinahanglan kini aron pagsustenir sa iyang kaugalingon. Lisod tuohan nga way bugti kining mao nga tanyag. Unsa usab kaha kini ka epektibo sa pagsulbad sa suliran sa trapiko? Ang mga siyudad sa Mandaue ug Lapu-Lapu nga bag-o lang nag-upgrade sa traffic lights, niluag ba ang mga sakyanan sa kadalanan? Ang no contact policy sa Mandaue epektibo ba?

Bisan tuod og karaan na ang traffic system sa siyudad sa Sugbo nga gipasigarbo kaniadto, di maayong dali-dalion ang paghulip niini. Mas maayo kon mangimbitar og lain pang mga grupo nga mopresentar usab sa ilang kapabilidad, inay modiretso lang sa pagdawat sa sistema sa usa lang ka kompaniya.

Gikan niini, masuta kon asa nila ang mas labing maayo, mas magamit sa sitwasyon sa siyudad, mas epektibo ug makatabang sa maayong pagdumala sa trapiko. Nganong di higpit ipatuman sa Siyudad ang balaud sa trapiko aron pagdisiplina sa mga drayber nga badlungon? Namatud-an na kini sa counter flowing.

Busa, di maayong modiretso og ambak sila si Guardo. Tun-an una og maayo ang tanyag kay ang suliran sa trapiko wa magkinahanglan og band aid nga solusyon