BAHIN SA LIDERATO TUYO SA MAGNOLIA
4:30 pm- Columbian Dyip batok Magnolia 7:00 pm- Rain or Shine batok Alaska Mosuway pagkuha og bahin sa liderato ang Magnolia Ang Pambansang Manok Hotshots sa ilang pagpakigbatok sa Columbian Dyip sa premirong duwa karong hapon sa Philippine Basketball Association (PBA) Governor’s Cup sa Araneta Coliseum.
Ang Hotshots, nga adunay 4-1 nga rekord, mosagubang ning sangkaa nga adunay taas nga moral gumikan kay gikan sila sa duha ka sunodsunod nga kadaugan diin ang labing ilahi nilang gipukan mao ang gikahadlukang San Miguel Beermen, 109-108.
Kon buot hunahunaon, grabe ka dako ang bintaha sa Hotshots kumpara sa Columbian Dyip apan aduna sila’y kinahanglang sagubangon ning kombatiha – kahago.
“This is our fourth game in 10 days and I know my players are a little bit tired,” matod ni Magnolia coach Chito Victolero.
“But I told them na we need to finish strong and push ourselves to win this very important game. It’s about heart and minds this time.” Ang kadaugan sa Hotshots magtuboy kanila sa liderato diin ilang ikauban ang Brgy. Ginebnra Gin Kings nga adunay 5-1 nga rekord. Ang Columbian Dyip wala pa’y daog sulod sa unom ka mga
duwa apan alang kang Victolero, dili gihapon sila angayang mokompiyansa bisa’g gamay.
“Columbian is a very dangerous team. We cannot afford
to relax,” pasabot ni Victolero. Sa main game, ang Rain or Shine Elasto Painters moparada og bag-ong import sa ilang pagpakigsangka sa Alaska Aces.
Gikuha sa Elasto Painters si Terrence Watson aron ihulip kang J’Nathan Bullock, kinsa dili impresibo sa nag-unang duha ka mga duwa sa Elasto Painters diin pulos kapildihan ang nasinati sa team.
Nanghinaot ang Elasto Painters nga sa pagpangulo ni Watsons, maangkon na nila ang labing una nilang kadaugan ning komperensiyaha.
Si Watsons kanhi nagduwa sa San Miguel ning maong komperensya sa miaging tuig diin nag-average siya og 23.6 puntos, 11.4 rebounds, 3.2 assists, ug 2.2 blocked shots.
Ang Elasto Painters tatawng nagsalimoang sa nag-una nilang duha ka mga duwa diin gipangkastigo sila sa Magnolia, 76-92, ug Talk N’ Text KaTropa.
Giangkon ni Elasto Painters
coach Caloy Garcia nga naapektuhan ang ilang duwa gumikan sa ulahi nga paghiabot sa unom nila ka mga sinaligan nga pulos nagduwa sa Team Pilipinas sa 18th Asian Games sa Jakarta.
“We felt that we had to make a change that we need an import that can play on the post and help us on the boards. Hopefully he could bring us energy too on the defensive side,” pasabot ni Garcia.
Batok sa Alaska, nga usa sa gikahadlukang mga puwersa, ang Elasto Painters nagkinahanglang mokayod og insakto sa tinguhang maposte nila ang labing una nilang daog ning komperensiyaha.
Ang Aces adunay 3-1 nga rekord.