Salvaging?

Nabulabog og natugaw ang kabuntagon sa mga lumolupyo sa sitio Kan-irag sa Barangay Malubog, dakbayan sa Sugbo kagahapon sa kaadlawon human mabati ang masipang nga mga buto-buto. Pagkahuman sa buto-buto, milit-ad ang lima ka mga patay’ng lawas. Duha ka mga patay ang naa sulod sa puti nga van nga adunay plate number GFF 192, samtang tulo ang anaa sa gawas sa van diin dunay duha ka mga motorsiklo sa ilang duol.

Usa sa mga survivor nga nailhan nga si Charmaine Puron, taga sitio Avocado, Mambaling nga akong nahinabi sa dySS Super Radyo, miasoy sa nahitabo kaniya ug sa iyang mga kaubanan. Matod niya nga gipick up siya sa mga pulis niadtong Miyerkules sa hapon diha sa One Pavilion sa Banawa uban sa usa ka Juvil.

Miangkon siya nga nagabot sila sa One Pavilion kay aduna silay gika-transaksiyon kabahin sa drugas. Adunay nanawag kaniya nga mi-order og drugas. Iyang gikuyog si Juvil nga maoy nagdala sa drugas. Apan pag-abot nila sa One Pavilion, gidakop sila sa mga pulis nga naka-civilian attire. Gipasakay sila sa van ug gidala sa nagkalainlaing lugar. Apan dugay silang gipaestar sa usa ka bodega duol sa Marco Polo Hotel, diin duol sa PC Hills nga gipuy-an sa police officers nga nadestino sa PRO 7.

Pagkakaadlawon gipasakay sila ni Juvil og balik sa van kauban sa laing tawo nga wa siya makaila. Gitaptapan ang ilang mga mata. Didto sila dad-a sa bukid. Ug didto laing mga tawo nga sakay sa laing van ang gipakanaog. Sa dihang nahibalo sila nga pamatyon, nangayo silag kalooy sa armadong mga tawo apan girapido ang van ug ang uban sa gawas samtang nagluhod.

Matod ni Charmaine nga milukso siya gikan sa van ug iyang gitukmod ang mopusil unta kaniya, dayon layat sa bung-aw. Gisundan siyag pusil og maayo nga wala siya maigo. Nagligid-ligid siya dayon dagan. Gipangita pa siya sa mga nagpusil kaniya. Mitago siya sa kasagbutan ug migawas dihang hayag na og diha nay mga tawo nga responde sa maong hitabo. Nagkanayon siya nga “salvage” ang nahitabo kanila. Adunay laing lakaki ang naka-survive.