PULIS BANTAY SA SURVIVORS

CITY HALL ANG MOGASTO SA 2

Gipabantayan og duha ka pulis ang duha ka survivor sa Cebu City Medical Center (CCMC) sa giingong ambush niadtong Huwebes sa kaadlawon didto sa Barangay Mabulog, bukiran sa amihanang bukirang distrito sa siyudad.

Ang CCMC administrator nga si Kenneth Siasar nagkanayon nga gipabutangan og pulis ni PCSupt. Debold Sinas sa Police Regional Office (PRO)7 ang gawas sa hospital aron modepensa sa survivor sa higayon nga adunay tinguha sa pagtiwas pagkutlo sa ilang kinabuhi.

Si Sinas kaduha na nibisita sa CCMC, una niadtong Huwebes ug ikaduha kagahapon sa alas 10 sa buntag para pagsusi sa duha ka survivor.

Gihulagway ni Siasar nga anaa pa sa kalisang ang duha ka biktima diin ang lalake adunay samad pinusilan sa bukobuko samtang ang babaye nakaangkon lang og bun-og ug mga garas sa iyang lawas diin nakasinati na sila og panakit sa ilang kalawasan.

Matod sa hospital administrator nga vocal ang mga survivor sa pagtumbok kinsa nag nagbuhat sa krimen ug nagpatay sa ilang mga kauban apan kagahapon dihang gisuwayan og interbyu sa mga tigbalita nagpanagana na ang mga biktima. “Pag-abot nila they were so

vocal sa posible kinsa ang nihilabot kanila pero sa pagkakaron nga nabisitahan sila og pulis tahado na sila mosulti di na sila motingog, confused o naglibog sila kinsa ang tuhoan,” padayag ni Siasar.

Ang duha gikatakdang ipada ngadto sa Vicente Sotto Memorial Medical Center para sa stress debriefing diin ang bayranan sa ospital abagahon sa Cebu City Government.

Ang PRO-7 nitanyag usab kon maglisod og bayad ang pamilya sa duha sa ospital, ang PRO 7 andam mobayad base sa pamahayag ni Sinas ngadto kang Siasar.

WA MOTUMBOK?

Sa Sinas, sa interbyu sa mga tigbalita, niingon nga sila si Belande ug Poran nanghimakak nga ilang gipasanginlan ang mga pulis nga maoy responsabli sa pagpatay sa lima ka mga lalake sa Ayala Heights Barangay Malubog niadtong Miyerkules sa kaadlawon.

Ang anak ni Belande nitug-an kang Sinas nga di pulis ang gipasanginlan sa iyang amahan ug kadtong unang migawas nga balita sa radyo tungod kadto sa kahadlok nga gibati.

Ang iyang estorya ha. ‘Sir, wala baya nag-estorya ang akung papa nga pulis. Koan lang siya ato, Sir, na shock siya ato,’ Naa man si Antonio sa akong atubangan niingon siya nga basin pulis pero wala siya kahibalo,” matod ni Sinas.

Matod ni Sinas, kinsa nibisita sa duha ka survivors sa CCMC nga nangayo nag tabang ang pamilya sa duha nga kon mahimo bantayan sila sa mga pulis hinungdan nga magpadayon ang pagbantay nila sa gawas sa ospital.

Nagtuo si Sinas nga nasayod si Poran kon kinsa kadtong mga lalake nga nipasakay kanila sa puti nga van nga nagpatuo nga mga pulis tungod sa gipangsul-ob nga uniporme nga pulos itom apan gipasagdan lang una niya ang mga imbestigador nga makadiskobre kon kinsa kini.

Apan aduna na silay inisyal nga impormasyon kinsa kining maong grupo nga ang mga miyembro nasikop usab sa one time big time operations sa Cebu City Police Office (CCPO) nga giila sa Barangay Tejero nga Tres Marias o tulo ka magsuong babaye nga nalambigit sa illegal nga drugas o sakop sa usa ka dakong sindikato sa drugas sa Sugbo.

Nailhan na usab ang mga nangamatay nga silang Carl Cabahug, 26, taga sitio Camansi, Barangay Lorega San Miguel; Leyster Abella, 26, taga Lucio Drive, Calamba; Rolando Tayor, 29, taga A. Lopez, Barangay Labangon, Diorvan Sarijorjo ug Christopher Tangag. /