■PROTESTA:

Gibabagan sa anti-riot police ang mga sakop sa militanteng pundok nga nagrali atubangan sa Apo Cement Corporation sa dakbayan sa Naga aron sa pagpahunong sa quarry sa Barangay Tina-an. Samtang Kapitolyo miandam na sa rekisitos sa pagdonar sa duha ka hektaryang luna alang sa mga apektado sa landslide.

Andam na ang deed of donation alang sa hingpit nga pagdonar sa Kapitolyo sa usa ka bahin sa Balili Property ngadto sa siyudad sa Naga nga gamiton nga relocation site sa mga lumolupyo nga apektado sa landslide sa Barangay Tina-an.

Matod ni Gob. Hilario Davide III nga pagtugot nalang gikan sa Hunta Probinsiyal ug iyang pirma maoy kuwang niini.

Karong Lunes, tukion sa Hunta Probinsiyal ang resolusyon paghatag og awtoridad sa gobernador sa pagpirma sa dokumento.

Sa laing bahin, gipadayag ni Davide nga luwas ang bahin sa Balili Property nga himuong relocation site.

Kini taliwala sa kabalaka sa mga apektadong residente nga peligroso ra gihapon kini tungod kay duol kini sa dagat.

Matod sa gobernado nga layo ra sa dagat o sa baybayon ang 2.7 ka ektarya nga luna nga maoy himuong relocation site.

Gihimug-atan sab niya nga solid ang dapit sanglit didto man giestablisar ang riles sa tren.

Dugang ni Davide nga wa pa say kasaysayan sa dapit nga dunay storm surge nga nahitabo.

/ ALEX BADAYOS ■ BALILI PROPERTY: Molupyo sa dakbayan sa Naga nanginhas alang sa pagkaon sa baybayon duol sa Balili property diin usa sa mga relocation site sa mga biktima sa landslide. Makita sa luyo ang dapit nga nahitabo ang landslide sa Barangay Tinaan.