LOLO NGA WANTED SIKOP SA BUY BUST

Senior citizen nga nalakip sa talaan sa top 10 wanted persons sa lungsod sa Cordova, Sugbo ang nadakpan dungan sa gihimong “one time big time” operation sa maong dapit.

Samtang unom ka tawo ang nasikop sa drug bust operation ug laing 10 ang nadakpan gumikan sa illegal gambling.

Giila ni P/SInsp. Efren Diaz Jr, hepe sa Cordova Police Station, ang lolo nga dinakpan nga si Simpliciano Obregon, 65, taga Sityo Cansubing, Barangay Buagsong, Cordova nga nga anaa sa listahan sa “wanted person” municipal level.

Si Obregon nag-atubang og kasong frustrated murder hinungdan nga nalutsan og warrant of arrest.

Gipaubos sa operasyon sa Municipal Drug Enforcement Unit (MDEU) sa Cordova Police Station ang Sityo Bangcal, Barangay Ibabao diin unom ka tawo ilang nasignit.

Ang mga dinakpan naglangkob nila ni Delfin Comoso, 35; Cesar Tirol, 28; Marcelo Sumalinog, 45; Alvin Samosa, 32; Jacklord Pogoy, 32; ug Jon Paniergo, 31.

Ang kapulisan nakahipos og mga ebidensiya nga mga pakete nga adunay sud nga gituohang shabu nga nagkantidad kapin sa P13,000.

Laing nakuha ang kalibre 45 nga pistola nga adunay 12 ka mga bala gikan sa posisyon ni Marcelo Sumalinog.

Naatlan sab ang laing 10 ka tawo nga nagsugal sa duwa nga tong-its hinungdan nga giapil og karga sa patrol car.

Atol niining pagsuwat giandam na ang tukmang kaso nga isang-at batok sa mga dinakpan.