Umbrella plant maoy solusyon sa polusyon
Gisugdan sa kagamhanan sa Mandaue ang pagpananom og umbrella plant sa Butuanon River alang sa rehabilitation sa maong sapa sa dakbayan.
Matud sa Department of Agriculture, ang Cyperus alternifolius L. o mas giila nga umbrella plant makatabang sa paglimpyo sa hugaw nga tubig sama sa kontaminadong sapa tungod kay musuyop kini og mga chemical nga makadaot sa sapa.
Kini gipamatud-an ni Mandaue City Planning and Development Office Architect Charlene Cañete human nila gisagop ang pagtuon sa mga tinun-an sa kursong Chemistry sa University of San Carlos sa dakbayan sa Sugbo.
“Among gi-adopt ang ilang study kay na-prove man gyud nila nga mu-uptake siyag mga chemicals,” saysay ni Cañete.
Gisaysay ni Cañete ang kahimtang sa Butuanon river nga giila sa Department of Environment and Natural Resources (DENR) nga Class D nga nagpasabot nga kinahanglan na og pagtagad ang sapa.
“Ang status man gud sa Butuanon river, classified siya as class D. Ang class D is intended for agricultural purposes na ang water. Nya karon kay polluted naman kaayu siya,” dugang ni Cañete.
Ug niadtong tuig 2016, gisugdan ang plano sa kagamhanan sa dakbayan sa Mandaue nga paninduton ang maong sapa.
Matud ni Mandaue City Agricultural Technologist Irenea Orbien nga dakong tabang ang umbrella plant tungod makapugong usab kini sa landslide.
“Makatin-aw siya sa tubig kun itanom nimo makapugong usab siya sa landslide,” padayag ni Orbien.
Dugang niya nga ang pagpananom sa umbrella plant mahimo isip makapamatngon sa katawhan nga dili na angayang maglabay og basura sa mga sapa sama sa Butuanon river.
“Amo nang gustong padaghanon diri sa Butuanon river kay para mauwaw sad sila maglabay og sagbot diri sa riverside,” nagkanayon si Orbien.
Sa pagkakaron aduna nay pipila ka mga umbrella plants ang anaa nahimutang dapit sa Butuanon river ug plano nila nga iabot ngadto sa 6,200 pa niini ang itanom alang sa rehabilitation project.
Plano karon sa kagamhanan ang pagtukod og viewing deck kilid sa Butuanon river aron pagdani sa mga turista nga gustong makakita sa sapa.
Misyon sa kagamhanan nga mapanindot ang sapa ilabi na nga nagkadoul ang International River Summit sa d ipa mahuman ang tuig.