Media gibasol ni Sinas?

Hugot ug daling gipanghimakak ni Supt. Debold Sinas, director sa Police Regional Of ice sa Central Visayas, ang mitumaw nga pagduda nga mga pulis ang responsabli sa pagpamatay sa lima ka mga tawo didto sa bukirang barangay sa Malubog, dakbayan sa Sugbo niadtong Huwebes.

Sa press conference, si Sinas mibutyag nga busy ang mga kapulisan sa pag-implementar sa “One Time Big Time” operation, nga mikalas usab og siyam ka mga kinabuhi sa dakbayan sa Talisay ug Lapu-Lapu.

Pito gyud unta to ang mapatay niadtong hitabo-a, pero nakaikyas ang duha – usa niini babaye – ug mao kini nakasaysay sa tinud-anayng hitabo.

Pero ang wa nato masabti ni Sinas kay ang mga reporter nga igo ra intawon mipadungog sa ilang nakuha nga kasayuran nga gikan mismo sa mga survivors mao na hinuon ang iyang gibasol sa pagpakatap sa balita nga mga pulis ang mibira sa mga biktima.

Si Antonio Belande, usa sa mga nakaikyas, miasoy sa mga tigbalita nga mga pulis ang midala kanila didto sa maong dapit ug didto gibanhigan apan nakaipsot kini human miligid sa bakilid ug nakatago sa kalibunan.

Ang babaye usab mitug-an nga mga sakop sa Special Weapons and Tactics (Swat) maoy mitipi sa iyang mga kauban. Iyang giangkon nga nahikuyog siya sa iyang kauban nga nag-deliver og shabu.

Makapahibulong kay imbis hatagan og importansiya ang pamahayag sa mga testigos nga mao untay magyawe ug mogiya sa kamatuoran, si Sinyas mideritso lang dayon og dupa sa mga kapulisan nga wa gani gihimong imbestigasyon.

Unsaon man pagsulbad sa atong mga kapulisan ang krimen kon ang kredebol nga mga testigos ila lang isalikway? Kinsa man diay patug-anon ni Sinas sa tinud-anay nga hitabo?