10th Balik-Baroto Regatta sa Talisay sa Oktubre 12
Gibanabana nga moabot ngadto sa 50 kapin ka mga partisipante ang mosalmot sa Balik-Barot Regatta nga ipahigayon karong Oktubre 12, 2018 sa dakbayan sa Talisay.
Atol sa press conference nga gipahigayon sa Kuya J Restaurant sa SM City - Seaside, ang co-founders nga sila si kanhi Customs Collector David S. “Boy” Odilao ug Tuburan Mayor Aljun Diamante, mipasabot sa kamahinungdanon ning pag-promote sa Balik-Baroto Regatta nga anaa na karon sa ilang ikanapulo nga edisyon.
“Ang usa sa katuyo-an nato sa pagpromote ani mao ang pagprotehir sa kalikupan pinaagi sa sports. Atong ipaabot ngadto sa atong mga fishermen nga makakuha tag isda nga anhi ra sa duol nga magbugsay lang. Wala na kinahanglana ang mga di makina nga mga pumpboat. So, in this way, motabang sila pagprotehir sa atong kabaybayunan aron modugok ang mga isda sa duol,” mao ni Diamante kinsa nanghinaot nga kahatagan usab unta kini og igong suporta sa mga local government unit (LGU).
Si Odilao, sa iyang bahin, nagtuo nga molapad pa unya ang Balik-Baroto Regatta competition dili lang dinhi sa Sugbo kon dili sa ubang dapit sa Kabisay-an ug Mindanao.
Iyang gihimong sanglitanan mao ang Hinunangan, Leyte nga nakapahigayon sa maong event niadtong Hunyo ning tuiga.
Mokabat ngadto sa P149,000 ang ganting nakahan-ay alang sa mga mananaog sa maong kompetisyon nga magsilbi usab nga kalihukan sa naghinangat nga kapistahan sa Talisay.
Inabagan ni Cebu Governor Hilario Davide III, ang champion makadawat og P30,000, ang 1st runner-up makaluklok og P25,000 ug P20,000 usab ang mahipos sa 2nd runner-up.Aduna usab silay mga tropeyo.
Mouli nga may tag P15,000 ug P10,000 ang 4th ug 5th placers samtang tag P3,000 ang ikaunom ngadto sa ika-10 nga dapit.
Ang ika-11 ngadto sa ika-25 nga luna may tag P2,000 ang matag usa.
Tadlason sa mga partisipante ang gilay-on nga upat ngadto sa lima ka milyas.