USJ-R maniguro; USPF manikaysikay

Mga duwa karon

1:00 pm- USPF batok SWU (High School)

2:30 pm- USJ-R batok CITU (High School)

4:00 pm- USJ-R batok USPF (College)

5:30 pm- SWU batok CITU (College)

Suwayan sa USJ-R Jaguars nga pahayagon og samot ang ilang poruhan sa inilugay og mga puwesto sa top 2 sa ilang pagpakigbatok sa USPF Panthers sa ikatulong duwa karong hapon sa CESAFI college basketball sa Cebu Coliseum.

Mihayag nang daan ang paglaom sa Jaguars sa inilugay sa top 2 human nila gipangmasaker ang UC Webmasters, 74-57 niadtong Huwebes.

Ang Webmasters(9-2), Jaguars (7-3) ug defending champions UV Green Lancers (8-3) mao na lang ang nag-ilog og mga luna sa top.

Ang Panthers (5-6), nagkinahanglang modaog ning sangkaa aron makaseguro og luna sa semi-finals nga wala pa nila nabuhat sukad masukad.

Sa premirong panagsangka sa duha ka mga kampo niadtong Septiyembre 11, gipangpukant sa Jaguars ang Panthers, 70-61.

Sa main game, magtagbo ang parehong wala na’y poruhan nga makaabante sa sunod round nga mao ang Southwestern University (SWU) Cobras ug Cebu Institute of Technology University (CITU) Wildcats, nga pulos adunay 2-8 nga rekord.

Sa high school division, magsangka sa premirong duwa ang USPF Baby Panthers (2-4) batok SWU Baby Cobras (1-6) unya mosunod ang kombati sa USj-R Baby Jaguars (4-3) batok CITU Wildkittens (2-5).