BRONER IKONTRA NI PACMAN SA ENERO

DILI pa man tuod si Floyd Mayweather Jr. ang sunod makontra ni Manny Pacquiao apan posibling gikan ra usab sa kampo sa undefeated fighter nga gitawag “Money Man.”

Si kanhi world champion Adrian Broner ang sa kalit lang maoy nag-una sa listahan nga posibling makontra sa Filipino boxing superstar sa sunod nga away niini nga magsilbing tuneup fight sa nauwahi sa dili pa mahitabo ang Pac-May rematch sunod tuig.

Ang 29-anyos nga Broner, kanhi kampiyon sa upat ka weight classes, mipirma og lima ka away nga mokantidad og $50 million sa Floyd Mayweather Promotions sa niaging Hunyo.

Hinuon gawas kang Broner anaa usay uban nga apil sa mga pilianan nga makigsangka sa kasamtangang kampiyon sa World Boxing Association (WBA) welterweight division.

Kini naglakip sa iyang kanhi sparring partner nga si Amir Khan ug Keith Thurman.

Wa pa man tuoy kasabutan nga nakab-ot, apan si Pacquiao mipabuhagay nang daan nga si Enero sunod tuig siya moaway.

Ang Showtime, nga maoy mopasalida sa mga away ni Mayweather, wa mokompirmar kon duna na bay nagpadayon nga negosasyon sa kampo ni Pacquiao ug Mayweather kalabot sa ilang rematch.

Apan ang presidente sa kompaniya nga si Stephen Espinoza nagtuo nga sa sayong bahin sa sunod tuig mao gyud unta ang tukma niini.

Ang duha, kon kahinumdoman, sa niaging buwan, nagkita didto sa Japan sa usa ka konsiyerto ug didto naumol ang posibli nilang ikaduhang panagsangka human si Mayweather mipadayag nga mobalik og away.