CEBU CITY VS. MAKATI

Mga duwa karon 7:00 pm- Zambales batok Basilan 9:00 pm- Cebu batok Makati

Sa pag-host sa nagsalimoang nga Cebu Sharks sa Makati Skycrapers sa main game karong gabii sa 2018 Maharlika Pilipinas Basketball League (MPBL) Datu Cup sa University of San Jose Recoletos (USJ-R) Basak Campus gym, usa ka punto ang sandigan og maayo sa Sugbuanong puwersa – homecourt advantage.

Ang team manager sa Sharks nga si Mark Castillo miawhag sa mga Sugbuanon nga mahiligon sa basketball sa paghatag og kinatibuk-ang suporta sa ilang puwersa sa pamasin nga makabangon kini sa kasamtangang niining lisod nga sitwasyon.

Ang Sharks nagbitay sa labing ilawom nga dapit sa Southern Conference dala ang 1-8 nga rekord.

“First time nato nga mo-host og duwa, basin ang atong players ma-motivate sa crowd,” asoy ni Castillo sa pagpakighinabi ning mantalaan.

Ang Sharks nakatilaw og mga kastigo sa nag-una nilang upat ka mga duwa batok sa Parañaque Patriots, 73-81, Muntilupa Cagers, 76-107, Basilan Steel, 76-86, ug Bacoor Strikers, 71-76.

Human niini, natilawan sa Sharks ang labing una nilang kadaugan sa torneyo batok sa Batangas City Athletics, 72-66.

Apan human niini, nasagunsonan na sab og upat ka sunodsunod nga pilde ang Sharks batok sa Davao Occidental Tigers, 64-71, General Santos Warriors, 66-70, Imus Bandera, 61-90, ug Bataan Risers, 69-76.

Hinuon dili pa ulahi ang tanan alang sa Sharks ug aduna pa kini poruhan nga makasulod sa playoffs apan kinahanglang sugdan na nila ning higayuna ang pagbangon.

Giangkon ni Sharks coach Titing Manalili nga ning puntoha, grabe ka tungason ang ilang pagkatkat paingon sa

playoffs apan wala sila mawad-i sa paglaom. “Kuwang man gyud ta’g big

men pero mo-fight gihapon. Aning duwaa, ang ato gyud saligan ang homecourt advantage,” asoy ni Manalili. Ang Skycrapers kasamtangang nahimutang sa ikaunom nga dapit sa Northern Conference dala ang 6-3 nga rekord.

Sa premirong duwa, magkombati ang Zamboanga Balientes batok Basilan Steel.

Ang Valientes kasamtangang nahimutang sa ikawalo nga dapit sa Southern Conference bitbit ang 4-5 nga rekord samtang naa sa ika-11 ang Steel kargada ang 4-6 nga rekord.

/ MPBL IMAGE ■ SHARKS: Ang mga beteranong Sugboanong journeymen nga si Patrick Cabahug, naghupot sa bola, ug John Abad, sa luyong bahin, maoy nag-unang pambato sa Cebu City Sharks sa ilang pagpakigkombati karong gabii batok sa Makati Scrappers sa MPBL Datu Cup nga ipahigayon sa USJ-R Gym Basak-Campus, dakbayan sa Sugbo.