GIHUNONG NA:
Balloons nga anaa’y “happy birthday” mao ang gipalupad sa mga nagbangutan nga iyaan ni Riz Janine Campanilla, kinsa lakip sa nakalas sa landslide sa Barangay Tinaan, dakbayan sa Naga.
Kagahapon atol sa pormal nga deklarasyon sa paghunong na sa search and retrieval operations sa ground zero, gihimo ang usa ka santos nga misa diin human niini giprosesyon ang imahen ni St. Francis of Assisi ug ni Sr. Sto. Niño dungan sa blessing sa landslide site.
Magselebrar unta si Riz Janine sa iyang ika-13 nga adlawng natawhan kagahapon apan tungod kay nalakip kini, ang paghalad og kandila ug pagpalupad sa balloons mao nalang ang gihimo sa iyang iyaan nga si Gwen Lesley Macalinao.
Dihang natapos ang santos nga misa sa ground zero, nanglugmaw ang mga luha ni Naga City Mayor Kristine Chiong nga namulong atubangan sa tanang responders lakip na ang mga miyembro sa pamilya nga nailo sa ilang mga paryente nga nalubong sa pagdahili.
“This is the time that we stay united, we stay in prayer nga makabangon ang Naga ug ma-comfort ang tanan nga nawad-an og loved ones,” si Chiong nagkanayon.
Gihulagway nga di na luwas ang ground zero ug di na usab makarisgo pa nga aduna’y laing kinabuhi ang makalas,
“We are on our day 17, somehow as the responsible officer of the whole operations, I have to make the hard decision,” dugang ni Chiong.
Matod sa mayor nga napasabot na ang mga pamilya nga hangtod karon naghuwat sa lawas sa ilang kabanay nga nakalas ingon man base usab sa rekomendasyon sa Mines and Geosciences Bureau (MGB) Central Office ang ilang deklarasyon sa pagpahunong sa retrieval.
Kagahapon, sa labing uwahi nga tally, niabot na sa 78 ang kompirmado nga patay nga naila na, lima ang missing samtang aduna’y 13 ka mga unidentified body parts ang natala.
Sa pagkakaron, naghuwat na lang ang local government unit (LGU) sa geohazard reduction plan sa Department of Environment and Natural Resources (DENR) aron masuta kon asa mga mga panimalay ang mamahimo pa nga balikan pagpuyo og asa ang dili na.
Human ni-pull out ang kasagaran sa responders sa ground zero, gipabilin na lang sa area ang kapulisan lakip ang army aron pag-secure sa kabtangan sa pamilya nga duol ang panimalay sa ground zero.
Gibutyag usab ni Chiong nga aduna’y 400 ka mga pamilya ang prayoridad sa ilang relocation ug financial assistance.
“Tingali ang thank you dili gyud enough to say to everybody how much I am appreciative and how much I am grateful nga naa mo,” si Chiong kinsa gipasalamatan ang tanang responders.
Ang ground commander ug pangu sa Cebu Provincial Disaster Risk Reduction Management Office Tribunalo Baltazar Jr., nagkanayon nga anaa na sila sa transition karon gikan sa humanitarian emergency phase paingon sa recovery and rehabilitation, ug reconstruction.
Nakigsabot na usab sila sa Apo Land and Quarry Corp., nga kon aduna’y makuha nga mga parte sa lawas, i-turnover sa LGU sa Naga aron ma-turn over sa hingtungdang pamilya.