SALVAGE ANG GIHIMO SA MGA PULIS?

Mga pamilya sa napatay sa One Time Big Time operation sa kapulisan sa dakbayan sa Talisay nangayo og hustisya alang sa giingon nilang di makiangayon nga pagpatay sa ilang mga mahal sa kinabuhi.

Singgit karon sa mga pamilya sa lima nga napatay sa kapulisan sa Barangay Tanke ang hustisya.

Si Talisay City police chief Superintendent Marlu Conag, sa sayo pa, niingon nga ang lima nga napatay sa Barangay Tanke ningsukol atol sa operasyon niadtong Huwebes.

Matod ni Conag nga 11 ka mga search warrants ang ilang gipang serve, apil na niini ang sa Sitio Tunga, Barangay Tanke.

Apan ang matag pamilya sa mga napatay nikwestyon sa pamaagi sa kapulisan sa gipahigayong operasyon.

Nahinabi sa SuperBalita Cebu ang mga pamilya sa mga napatay sa maong operasyon samtang sila nagbantay sa haya sa ilang mga mahal sa kinabuhi sa gymnasium sa Barangay Tanke.

Si Filomena Rafanan, 76 anyos, kinsa agbantay sa haya sa iyang kamanghurang anak nga si Cresencio “Junior” Rafanan Jr., nga napatay niadtong Huwebes sa kadlawon, niingon nga nakugang siya sa hitabo.

“Wa ko katingog kay pag gawas nako, abi nako og wa nila patya pero gipatay diay. Wa ko kadawat,” nagkanayon si Nanay Filomena

Dugang nga niya atol sa gipahigayong operasyon, siya nihangyo sa kapulisan nga tarungon ang pag-aresto sa iyang anak.

“Sir, kon nakasala, dad-a, prisoha lang ninyo, Sir. Total moduaw man mi, ayaw lang intawn in-anaa pag pasakit akong anak,” asoy ni Nanay Filomena sa iyang pagpangaliyupo sa kapulisan.

Matod ni Yolanda Fernandez, 53, maguwang ni Junior, nga sakit sa iyang buot ang pagkawala sa iyang manghud nga mao ra’y lalaki ug kamanghuran sa lima ka mga magsuon.

“Kon nakasala lang unta to og tarong ba, ila lang untang tarungon og dakop kay amo man jung ihatag,” matod Fernandez sa Superbalita Cebu.

Siya nanghimakak nga nisukol si Junior kay pinusasan nang daan.

“Unsaon pagsukol ana, Sir, nga giposasan man daan unya gipusil ang tiil,” pasangil ni Fernandez sa mga pulis nga ningdakop sa iyang manghod.

Si Teresita Bongga, 58, inahan, kinsa nagsubo sa kamatayon sa iyang mga anak nga sila si Duane ug Jatty Bongga, niingon nga grabeng kagoul ang gibati sa ilang pamilya karon tungod sa nahitabo sa iyang duha ka mga anak.

Iyang panawagan ngadto sa kapulisan nga ipaagi og hustong proseso ang pagdakop sa mga dakpunon ug dili idiretso sa patay.

“Kon modakop, dakop, dili ingon nga patyon dayon,” asoy ni Teresita

Gipangusgan usab sa matag pamilya sa mga napatay nga way bisan usa ka armas ang ilang mga mahal sa kinabuhi.

“Di gyud na tinoud nga nanukol ning mga nangamatay ron kay nangatulog sila atong orasa,” ingon ni Nanay Teresita

“Kaingon ko, Sir, kon ila man diay tuyo nga patyon , maayo pa pagsud nila ila na lang gitirahan kay dili na lang mi makadungog sa siyagit sa akong manghud,” matod ni Fernandez.

Nibisita usab ang Superbalita Cebu sa Talisay City Police Station apan way bisan usa ka pulis nga moluwat og mga pamahayag kay si Conag ra ang makatubag. Apan si Conag wa motubag dihang gi-contact sa Superbalita Cebu. /