Dili na luwas?

Tungod sa sunodsunod nga kaso sa patay sa Sugbo, si Cebu Archbishop Jose Palma uban sa pipila ka mga opisyal ug netizens ang ningkomentaryo nga ang Sugbo dili na luwas. Dunay nitawag sa dakbayan nga ‘criminal city.’ Naaghat ang maong mga komentaryo human nitala og 16 ka mga tawo ang gipamatay sulod sa usa ka adlaw niadtong Huwebes. Napulo niini ka mga kaso resulta sa ‘One Time, Big Time Operations’ sa kapulisan batok sa gidiling drugas.

Ug ang lima napatay sa ‘shooting’ o ‘salvaging’ sa bukirang barangay sa Mabubog apan duha ang nakaikyas diin naa karon sud sa ospital atol ning pagsuwat. Usa niangkon nga dunay transaksiyon sa gidiling drugas sa Banawa, Barangay Guadalupe apan naronda, hinungdan sa pagduda nga awtoridad ang naghimo sa salaud sa pagpamatay.

Samtang, dunay alegasyon nga ang ubang kaso wala mosukol ang biktima, giplantiran og drugas o armas. Apan gihimakak kini sa kapulisan. Ang duguong panghitabo niadtong Huwebes ug nangaging kaso igo na bang basihanan nga tawgon ang dakbayan nga dili na luwas ug criminal city?

Sa pikas bahin, usa ka komentarista sa radyo nagkanayon nga tinuod nga nitaas ang kaso sa patay apan nikunhod usab pag-ayo ang ubang kriminalidad. Dugang niya, pwede na karon mag-text sa imong selpon bisan maglakaw sa dan sa dakbayan bisan gabii o ang gipanghayhay nga linabhan dili na mawala. Niminos usab ang mga siga og mata o adik nga hadlok nga ikatagbo human wala na sa tarong nga panghunahuna.

Sa balanseng sumada, tinuod dunay giingong napagan, apan kadaghanan sa napatay nalambigit sa negosyo sa drugas. Busa, matawag kaha usab nga ang Sugbo dili na luwas sa mga ilegalista apan paraiso sa sulundong mga molupyo?

Nasayod kita unsa kalisod ang kampanya sa kagamhanan batok sa gidiling druga nga dangan sa katilingban, apan mas mopatigbabaw gihapon ang kabililhon sa kinabuhi.