Abusado sa gahum
Nahimong kontrobersiyal karong bag-o si Partylist Rep. Aniceto ‘John’ Bertiz 111 sa ACTS-OFW gumikan sa iyang gipakitang dili maayong taras sulod sa airport didto sa kauluhan sa miaging Sabado sa buntag. Wala siya mosunod sa airport security protocol nga ipa-hubo ang iyang sapatos sa dili pa mo-agi ang mga pasahero sa x-ray machine.
Nakita sa CCTV nga nasuko siya og iyang gilabni ang ID sa security officer nga misita kaniya. Wala hinoon mabati ang audio sa CCTV. Apan klaro kaayo nga nirebenta siya. Nagtuo siguro siya nga hatagan og VIP treatment gumikan kay lagi usa man siya ka kongresista. Nag-viral ang maong panghitabo sa social
media. Ambot og si kinsa kaha
ang nagpagawas. Aw, taga airport ra pod siguro.
Sa dihang gikuhaan si Kong, Bertiz og reaksiyon, midepensa siya nga nasuko siya kay gipahubo siya sa iyang sapatos unya ang mga nag-una kaniya nga mga Chinese looking wala gipahubo. Gi-splice kuno ang CCTV footage. Sa dihang gipakita ang tibuok footage walay Chinese looking passengers
nga gihatagan og exemption.
Ang tanang pasahero nga nag-una og nagsunod kaniya, mihubo tanan sa ilang mga sapatos. Apil gani si Ilocos Norte Governor Imee Marcos. Pagkasulundon ning higala ni Komentarista Choy Torralba.
Diha na siya nabuking og napugos pagpangayo og pasaylo. Unya nangayo siya og dispensa kay morag ‘babaye kuno siya niadtong tungura nga naabtan sa ilang binuwan nga sakit.’ Ingon ana diay na? Basta dug-on ang mga babaye morag maghurimentado? Kakuyaw. Buot ipasabot ni Kong. Bertiz nga ‘gidugo’ pod siya’.
Porbida nang rasona. Daghang babaye diha, wala magwala o magtinaray kon motumaw ang ilang monthly period.
Rason na og mga kulukoy nga tawo. Ang unang rason nganong iyang gipakita ang maong taras kay nainsulto siguro nga gipahubo sa iyang sapatos. Lagi kongresista siya. Mao na nay giingon sa Iningles nga
‘what are we in power for’? Di ba? Mauwaw siya og hubo sa iyang sapatos kay buslot iyang medyas o baho iyang tiil.
Kining klase nga mga opisyal sa gobiyerno angayan disiplinahon.(bobbygnalzaro@gmail.com)