Babaye ug Lalaki
Binasi sa Genesis 2:18-24; Salmo 128; Hebreo 2:9-11; Marcos 10:2-16
Diha sa pinulongang Hebreo ang pulong sa “lalaki” ug “babaye” adunay susama nga letra. Kini ang letrang “ish” nga makita pod sa pulong “kalayo” sa Hebreo. Ang kalahian lang kay diha sa “lalaki” adunay letra “y” nga wala sa pulong “babaye” ug ang “babaye” adunay letra “h” nga wala sa pulong “lalaki”. Ang “Y” ug “H” mao ang una ug katapusang letra sa pulong “Ginoo” sa pinulongang Hebreo. Sa laktod nga pagkasulti, ang nagdilaab nga gugma sa Dios maoy gigikanan sa lalaki ug babaye.
Gugma sa Dios ang nagdugtong sa lalaki ug babaye. Gani adunay pagtuo ang mga pagano nga ang tawo kuno, tungod kay nagpabadlong batok sa mga diosdios, gihiwa isip silot ug ang tibuok kinabuhi niya gigahin sa pagpangita sa kapikas niya. Kon madungtong na gani sila, matibuok na ang tawo ug mahimutang na.
Sa panahon ni Jesus yano ra kaayo ang pagpakigbulag sa asawa. Mosulat lang og pahibalo sa pakigbulag ug pagpakigbulag. Apan dili kini ang orihinal nga plano sa Dios. Kay “sa sinugdanan sa pagmugna, gihimo Niya sila nga lalaki ug babaye. Tungod niini, mobiya ang lalaki sa iyang amahan ug inahan [ug makighiusa ngadto sa iyang asawa], ug silang duha mahimong usa ka lawas.”
Sukwahi ang pagbulag kon deborsyo sa plano sa Dios: “Busa dili na sila duha kondili usa ka lawas. Tungod niini, ang gihiusa sa Dios dili pagabulagon sa tawo.” Ang pagbulag dili plano sa Dios. Ang panaghiusa plano niya. Diha sa libro sa Genesis gilarawan ang maong plano. Nasayod ang Ginoo ang gamingaw ang tawo nga nag-inusara. Ni usa ka mananap angay nga kaparis sa tawo. Gipakatulog siya sa Ginoo ug gikan sa iyang gusok gihimo ang babaye. Partner diay sila. Dili nga ang usa naghawodhawod sa iyang kapikas kay silang duha adunay dignidad nga gikan sa Dios.
Dili sayon ang pagpabiling nagkahiusa. Daghang mga hagit ang giatubang sa mga magtiayon. Apan kanunayng anaa ang grasya sa Dios. Sagad ang mga panagbingkil, panaglalis, ug panag-away nagagikan sa garbo. Mao nga sa sulat ngadto sa mga Hebreo gihisgotan nga sa makadiyot gihimong ubos pa sa mga anghel si Jesucristo aron siya, nga mao ang lider sa kaluwasan, mahimong hingpit pinaagi sa pag-antos. Wala na gani sala si Jesus apan nagpaubos pa gayod. Kita pa kuno.
Daghan kitang mga personal nga relasyon. Kon kining mga relasyon makatabang sa atong kaluwasan ug subayon gyod nato ang labing uyok niini, makita nato nga Ginoo maoy nagpaluyo niining tanan.
Naningkamot ba kita nga molambo ang atong mga relasyon aron pinaagi niini mahatagan og dakong himaya ang atong Dios?