Di na ganahan

Usa ka Biyernes sa miaging buwan, niangkas nako ang akong anak nga babaye kay duna mi gitambungan nga seminar. Sayo sa buntag nanggikan na mi, mga duha ka oras sa wa pa ang schedule sa seminar.

Didto na siya nakakita sa kataas sa kutay sa mga sakyanan, gikan pa sa amoa sa Bacayan, saylo na sa Gaisano Country Mall. Didto, iyang natandi ang kahimtang sa trapiko pipila ka tuig na ang nakalabay samtang tig bike pa siya kaniadto, kasagaran kuyog nako.

Matod sa akong anak nga si Marylove nga wa nay ayo kon mosikad sa buntag sa mga adlaw nga tingtrabaho human niya makita ang struggle sa paglusot sa kutay sa mga sakyanan uban sa daghang scooters ug motorsiklo.

Kaniadto bitaw, sayon ra kaayo ang pagpamidpid sa daplin sa karsada bisan nagsumpotsumpot, apan karon nga daghan na ang motorized two-wheeled vehicle, lisod na ang biseklita. Mas lisod baya ang biseklita itandi sa motor, apan mas mosalig ko ini kon lusotlusot. Sa biseklita, manimbang ug mosikad ka pa samtang sa motorsiklo, igo ka rang mokumot sa manubela, modagan na. Panimbang ra ang imong gikinahanglan.

Kaniadto, daghan pa ang magbiseklita, apan karon mas nagkadaghan na ang nagmotor ug nag scooter. Sakto ang akong anak sa iyang obserbasyon mao nang mas ganahan kong magpabukid.

WAY SIDEWALK

Sa ako nang nahisgutan sa nangagi kong mga column, mas maayog panglantaw ang mga opisyal sa ubang mga nasod kay sa dinhi sa atoa. Kuwang pa kaayo og political will aron pagpatuman sa balaud. Samtang dagko kaayo ang kadaghanan sa mga sidewalk sa ubang mga dapit, dinhi sa atoa kadaghanan way pedestrian lane.

Tan-awa ra gud nang Banilad-Talamban nga karsada, mag-ilog ang mga sakyanan ug

pedestrian kay way sidewalk tungod sa mga balay ug establisemento nga naa sa daplin. Niadtong nangatunganan pa si kanhi mayor Mike Rama, nagpa pogi points siya sa publiko. Nagpa-cover sa media ug niingon nga kinahanglan maagian sa mga tawo ang daplin.

Hangtod karon, way nahitabo. Mao na nga kami sab nga nagnameho og two-wheeled nga mga sakyanan, pwerteng paninguha namo nga makalusot ug di makaigo sa mga pedestrian nga maglakaw usab sa daplin sa karsada. Duha ang among bantayan, wala ug tuo nga side.

KARAAN

Dinhi nimo makita ang kinaraan pang mentalidad sa mga opisyal, niadtong panahon nga mahimo rang magpatentero sa karsada kay maihap lang ang mga sakyanan nga mangagi. Apan karon, lahi na kaayo. Bisan sa kaadlawon, daghan pang mga sakyanan magdagan sa karsada.

Kanus-a pa man kaha kita makabaton og officials nga dunay panglantaw sa unahan?