We should face reality
Sa tan-aw ko kang Amir, malipayon siyang nakig-estorya sa babaye. Diha sila sa main lobby sa eskol. Nakakita siya nako. Giwara-warahan ko niya sa iyang kamot. Pagkahuman, wa na siya motan-aw nako. Nagpadayon silag estorya ug ang babaye. Every now and then, mohapak ang girl sa bukton ni Amir, morag nahimuot. Tingali, kataw-anan ang gisulti ni Amir kay mokatawa man ang babaye.
Mipakibo ko sa akong mga abaga. Tinuod, gisakitan ko. Ako unta ang gikasulti kanunay ni Amir kon gitagad ko pa ang iyang gugma nako. Apan wa ko magbasol sa pagsulti niya nga di mi angay sa usag usa, ug mangita na lang siyag laing babaye.
Morag duna koy kalinaw nga wa na siya magsigeg pangulitawo nako.
Niadtong gabhiona, nag-alindasay ko. Naglisu-liso ko sa akong higdaanan sa baratuhong boarding house nga akong gipuy-an sa siyudad.
“Naunsa ka man, Anna? Kalihokan gud nimo diha?”
Mibangon si Geraldine. Sa itaas nga bahin ang iyang higdaanan sa double deck namong katulganan. Gamay ra ang among kuwarto, ug usa ra ka double deck ang maarang. Kami rang duha sa maong kuwarto. Estudyante sab si Geraldine sa college, taga Leyte siya.
Mibangon sab ko. Gidungw ko ni Geraldine.
“Problema sa heart, no, ang naghasol nimo, Anna?”
Milingkod ko sa ngilit sa akong higdaanan. Gitando ko si Geraldine. Gisugid ko niya ang tanan bahin kang Amir ug kang Marlon. Mikanaog si Geraldine ug mitapad og lingkod nako.
“Ingon gyud ana ang gugma, An. Nakaagi sab ko ana, uy. Pero naka-move on man ko sa nadugay na. Love sab nako ang laki, pero giantos nako ang kaguol sa wa nako pagsugot niya. Gusto gyud kong makahuman og kurso, ug makatrabahog tarong. Lisod baya mi sa Leyte. Ako ra ang paglaom nila ni Mama ug Papa nga mahaw-as sila sa kalisod.” “Pila mo ka igsuon, Rald?” Sa unang higayon nagpakisusi ko sa kinabuhi ni Geraldine. Two years na ming nagkauban sa boarding house.
“Duha ra nuon. Ako ang kamagwangan. Gamay ra ang among uma sa Leyte. Nanawat og labada si Mama. Sure ko, An, nga maka-move on ka ra.”
Wa ko makaseguro kon ang gugma ko kang Amir mawala ba sa akong kasingkasing.
(TAPUSON SUNOD GULA)