INAHAN NA, AMAHAN PA

Dili mabayran og salapi ang mga sakripisyo ug pag-antos nga gihimo sa mga inahan ngadto sa ilang pamilya.

Samot na kon kini usab ang nagsilbi nga haligi sa panimalay kon wala na ang iyang katambayayong sa kinabuhi, ang iyang bana.

Susama kini sa kaagi ni

Justina Villamor.

Sud sa 37 ka tuig, nahimo siyang inahan ug amahan ngadto sa iyang unom ka mga anak.

Dili tiaw ang iyang gihimo nga mga paningkamot aron mabuhi ang iyang mga anak.

Ang iyang bana nga si Vicente Villamor Sr. namatay sa pangidaron nga 30 human kini giatake sa sakit sa kasingkasing niadtong Abril 16, 1981.

Giasoy ni Edito Villamor, inila nga head coach sa Ala Boxing and Fitness Gym ug kanhi

mini flyweight champion sa Pilipinas, nga aron mabuhi sila mga magsuon, ang ilang inahan nga si Justina nanglabada sa mga t-shirt sa ilang uyoan.

Nangangkat usab kini og para itinda sa eskwelahan sama sa ice candy, bayabas ug bisan unsay mabaligya aron dunay ikapakaon sa mga anak ug makapatungha nila.

“Maong proud kaayo mi sa among mama nga nagkatapok ra ming unom niya ka mga anak. Inspiration sad na sa uban mga ginikanan nga single mom,” padayag ni Edito. Nakasud usab og trabaho si Justina sa usa ka kompaniya og

construction nga kanhi gitrabahoan sa iyang bana sa dihang buhi pa. Ug hangtod karon naa ang ginang magtrabaho didto.

Sukad kaniadto hangtod karon, padayon nga giila ni Edito ug sa iyang mga igsuon ang mga sakripisyo nga gihimo sa ilang inahan.

Niadtong Septiyembre 26, 2018, gisaulog ni Justina ang ika 73 nga kasumaran sa iyang adlaw nga natawhan.

Usa ka salosalo ang giandam sa iyang mga anak uban ang ilang mga kapikas sa kinabuhi ug mga anak sa ilang panimalay.

Giandaman ang 73 anyos nga ginang og usa ka tibuok lechon baboy, pansit, ginamay, linutong alimango ug pasayan, adobong bisayang manok ug uban pang mga pagkaon nga maoy gisaw-an sa tibuok banay.

Isip bawos sa mga sakripisyo nGA gihimo ni Justina, gisuklian usab kini nila ni

Edito ug sa iyang mga igsuon ang ilang way kinutoban nga pagmahal, pagpangga, pagtahod ug pag-atiman ngadto sa inahan.

/ TAMPO ARNEL L. BALANSAG Graphic Designer ■ MAMA: Makita ang kasuod sa magsuong Villamor ug sa ilang inahan nga si Justina nga nagbinugtong sa pagbuhi sa mga anak human sayong mipanaw ang bana.