DURANT GIABIBAHAN SA SEATTLE FANS
Sa labing una niyang pagduwa og balik sa Seattle sulod sa usa ka dekada, si Golden State Warriors forward Kevin Durant nakadawat og naglanoglanog nga abiba gikan sa mga tumatan-aw.
Igo na kini aron madasig si Durant sa pagmugna og 26 puntos aron tabangan ang Warriors sa paglampornas sa Sacramento Kings, 122-94, sa pre-season sa National Basketball Association (NBA) kagahapon.
Si Durant nagduwa sa Seattle Supersonics sa labing una niyang tuig sa NBA una nabalhin ang ilang prankisa ug gitawag na kining Oklahoma City Thunder.
Sa wala pa nagsugod ang duwa, si Durant nagsul-ob og jersey ni Supersonics superstar Shawn Kemp nga nakahatag og kalipay sa mga tumatan-aw sa Key Arena.
Migunit og mikropono si Durant aron ipadayag ang iyang gibati sa pagbalik niya sa Seattle, nga nagpili kaniya isip No.2 overall pick niadtong 2007 drafting.
“First off, I want to get a shout out to the Seattle Storm for holding it down and winning a championship,” matod ni Durant.
“On behalf of myself, the NBA, our organization, my teammates we want to thank you guys for coming out and supporting us. I know it’s been a rough 10 years. NBA is back in Seattle for tonight. Hopefully it’s back forever soon.”
Sa labing una ug bugtong tuig niya nga pagduwa sa Supersonics, si Durant maoy napiling Rookie of the Year awardee human siya nag-average og 20.3 puntos, 4.4 rebounds ug 2.4 assists.
Ang kadaugan sa Warriors gipangulohan ni Klay Thompson pinaagi sa iyang 30 puntos lakip na niini ang unom ka three-point shots.
Sa laing bahin, wala moduwa si Kawhi Leonard sa labing unang home game sa bag-o niyang team nga mao ang Toronto Raptors.
Apan bisan pa niini, yano ra gipangmakmak sa Raptors ang Melbourne United 120-82.
Mao ra kiini ang bugtong home game sa Raptors sa ilang lima ka mga duwa sa pre-season.