Lancers, Webmasters magsangka'g balik
Mga duwa karon:
1:00 pm- UV batok DBTC (High school)
2:30 pm- UC batok CEC (High school)
4:00 pm- USC batok SHS-AdC (High school)
5:30 pm- UV batok UC (College)
Mag-engkuwentro og balik ang finalists sa miaging tuig nga mao ang defending champions University of the Visayas (UV) Green Lancers ug University of Cebu
(UC) Webmasters sa main game karong gabii sa Cebu Schools Athletic Foundation Inc. (CESAFI) college basketball sa Cebu Coliseum.
Sa kasamtangan, ang Webmasters nagpatong sa solong liderato bitbit ang 9-2 nga rekord samtang nagsunod kanila ang Green Lancers nga adunay 8-3 nga baraha.
Sa premirong panagsangka sa duha ka mga kampo ning tuiga, gipakaging sa Webmasters ang Green Lancers, 72-65, niadtong Septiyembre 15.
Ning puntoha, ang Webmasters ni coach Raul “Yayoy” Alcoseba ug Green Lancers ni coach Gary Cortes pareho pang wala nakaseguro og luna sa top 2 nga nagtangag og twice-tobeat nga bintaha sa semi-finals.
Ang resulta ning ilang kombati ug ang resulta sa nahabiling mga duwa sa University of San Jose Recoletos (USJ-R) Jaguars dako og epekto sa pagdeterminar sa top 2 teams.
Ning pagsuwat, ang Jaguars ni coach Leodie Garcia, nga adunay 7-3 nga rekord, padayon pang nakigsangka sa University of Southern Philippines Foundation (USPF) kagahapon.
Sa mga kombati sa high school division, ang UV Baby Green Lancers makigbatok sa Don Bosco Technological Center (DBTC) Greywolves sa premirong duwa.
Mosunod ang panagtagbo sa UC Baby Webmasters batok Cebu Eastern College (CEC) Dragons dayon ang panagsangka sa University of San Carlos (USC) Baby Warriors batok Sacred Heart School (SHS-AdC) Magis Eagles.