Canelo Alvarez moaway’g balik sa New York

Human sa dugay nga panahon, gianunsyo ni Mexican

boxing superstar Canelo Alvarez nga mobalik na siya’g away sa Madison Square Garden sa New York, USA nga maoy gikonsiderar nga Mecca of Boxing.

Mahitabo kini karong Disyembre 15 diin suwayan ni Alvarez pag-ilog ang titulo ni World Boxing Association (WBA) middleweight champion Rocky Fielding sa England. Taodtaod na sab nga nipadayag si Alvarez kabahin sa iyang insteres nga moaway og balik sa Madison Square Garden apan karon ra natuman ang iyang tinguha.

Si Alvarez, kinsa adunay 50-1-2, 34KOs nga rekord, gikan sa majority decision nga kadaugan batok kang Gennady Golovkin niadto lang Septiyembre 15 sa T-Mobile Arena sa Las Vegas.

Ning maong away, nakasinati si Alvarez ug dakong gisi sa iyang wa nga mata.

Hinuon, gitugtan na si Alvarez sa mga doktor nga maka-training og balik alang sa iyang umaabot nga tahas.

Ning awaya, nausa ni Alvarez ang International Boxing Organization (IBO), WBA Super World, ug World Boxing Council (WBC) middleweight titles.

Gipadayag ni Alvarez nga grabe ang iyang paghinamhinam kabahin sa umaabot niyang away. "I’m very excited to announce my next fight,” mensahe ni Alvarez sa iyang Twitter account nga napatik sa www. boxingscene.com.

“Next December 15th at the New York MSG. Taking a big challenge more in my career and representing the WBC as 160-[pound] champion now I will fight for the world title for the 168 [pounds] vs. Rocky Fielding current WBA champion!” Si Fielding naggunit og 27-1, 15KOs nga rekord./