MILAN MOGAMIT SA KASINATIAN
Gamiton ni kanhi world champion Milan Melindo ang iyang taas nga kasinatian sa iyang pagsuway og ilog sa korona sa mas batan-ong si World Boxing Council (WBC) light flyweight titleholder Ken Shiro karong gabii sa Arena sa Yokohama, Japan.
Sa interbyu sa Sun.Star Cebu, igsuong buhatan ning mantalaan, giangkon sa trainer ni Melindo nga si Edito Villamor nga maayo moaway si Shiro.
Apan alang kang Villamor, mopatigbabaw si Melindo ning awaya gumikan sa kasinatian niini diin daghan nang dekalidad nga mga boksidor sa kalibutan ang gikaharong niini.
Nidugang si Villamor, kinsa head trainer sa bantugang ALA stable sa Sugbo, nga aduna sila nakitang huyang sa abilidad ni Shiro ug mao kini ang angayang pahimuslan ni Melindo.
Sa miaging tuig, si Melindo miangkon sa International Boxing Federation (IBF) light
flyweight title pinaagi sa eksplosibong 1st round knockout nga kadaugan batok sa kababayan ni Shiro nga si Akira Yaegashi.
Nadepensaan ni Melindo ang iyang titulo pinaagi sa split decision nga kadaugan batok kang Hekkie Budler.
Apan sa ikaduha niyang depensa, nailog ang korona ni Melindo sa laing Japanese nga si Roichi Taguchi pinaagi sa unanimous nga kadaugan.
Dili pa man tuod tantong daghan ang mga away nga nasagubang ni Shiro apan dili mabangbang ang abilidad niini, gani gilupig niini ang kanhi world champions nga sila si Pedro Guevara ug Ganigan Lopez.
Asoy ni Melindo kinahanglang impresibo ang ipakitang away ni Melindo sa matag round aron makuha niini ang kadaugan bisan moabot pa sa tumoy ang binukbokay.
Si Melindo naggunit og 373, 13KOs nga rekord samtang adunay 13-0, 7KOs nga rekord si Shiro.
Kon modaog si Melindo, hayan iyang ikauban sa tapok sila si Manny Pacquiao (WBA
welterweight champion), Jerwin Ancajas (IBF flyweight champion), Vic Saludar (WBO minimumweight champion), Reymart Gaballo (interim WBA bantamweight champion) ug Jhack Tepora (interim WBA featherweight champion) isip kasamtangang boxing champions sa Pilipinas.