Metro Cebu Expressway hapit na

Naa na karon sa katapusang pag-review sa ulohang buhatan sa Department of Public Works and Highways (DPWH) ang updated feasibility study (FS) report sa 74 kilometros nga Metro Cebu Expressway nga gilauman nga makatabang sa pagsulbad sa nagkahuot nga dagan sa trapiko sa Metro Cebu.

Gitug-an ni Engr. Nonie Paylado, pangu sa planning and design division sa DPWH sa Central Visayas, nga base sa uwahing kasayuran nga ilang nadawat, karong buwana mahuman ang evaluation sa ilang ulohang buhatan sa FS report ug iduso dayon kini ngadto sa National Economic and Development Authority-Investment Coordination Committee (NEDA-ICC) alang sa dugang assessment sa 73.75 kilometros nga gitas-on nga expressway.

Matod niya, ang updated FS report naglakip sa fair market valuation alang sa mga luna nga paliton aron magamit sa road right-ofway (ROW) nga nahisubay sa bag-ong ROW Law.

Sa updated nga FS report, moabot sa P28.01 bilyones ang kinatibuk-ang balor sa expressway diin ang P15.01 bilyones ang alang sa pagpalit sa mga luna alang ROW samtang ang P13 bilyones alang sa civil works.

Atol sa tigom sa full council sa Regional Development Council (RDC) 7 sa miaging semana sa dakbayan sa Dumaguete, gipahibawo ni Paylado nga laing P300 milyones nga ubos sa National Expenditure Program (NEP) sa 2019, ang gigahin alang sa proyekto.

Una nang gipagawas ang P300 milyones nga alokasyon ubos sa 2018 General Appropriations Act (GAA) nga magamit sa civil works ug pagpalit sa mga yuta nga maapil sa karsada alang sa right-of-way alang sa pagsugod sa bahin sa Segment 3 sa Metro Cebu Expressway.

Gisugdan na ang civil works sa proyekto sa junction area sa Naga-Uling Road sa Barangay Pangdan, dakbayan sa Naga sukad niadtong Hulyo.

Ang maong expressway nga nalantawan makatabang pagpaminos sa biyahe gikan sa habagatan hangtod sa amihanang Sugbo og usa ka oras ug makapagaan sa kabug-at sa dagan sa trapiko sa Metro Cebu, motadlas agi sa bukirang mga barangay sa lalawigan sa Sugbo nga manukad sa dakbayan sa Naga agi sa mga siyudad sa Talisay, Sugbo, ug Mandaue ingon man sa mga lungsod sa Minglanilla, Consolacion, Liloan ug Compostela hangtod sa dakbayan Danao.

Ang pagtrabaho sa proyekto gibahin sa tulo ka segments diin ang segment 1 nga may gitas-on nga 26.8 kilometros nga karsada magagikan sa Talisay agi sa siyudad sa Sugbo ug lahos sa Mandaue; manukad sa Consolacion, agi sa Liloan ug Compostela ug dayon sa Danao ang ikaduhang segment nga may sukod nga 29.7 kilometros; ug 17.15 kilometros ang gitas-on sa ikatulong segment nga manukad gikan sa Naga hangtod sa Minglanilla.

Nalantawan kini nga matapos sa 2022 nga kabahin sa Build Build Build Project sa administrasyon ni Presidente Rodrigo Duterte.