Yate nasangad, 6 ka Chinese nationals luwas

Unom ka mga Chinese nationals lakip ang tulo ka tripulante ang naluwas sa Philippine Coast Guard (PCG) 7 niadtong Sabado sa hapon human masangad ang gisakyan niini nga yate sa kadagatan sa Bansaan Island, Talibon, lalawigan sa Bohol.

Human ma-rescue ang maong mga sakay, gibitad sa PCG 7 gamit ang BRP Capones ang MV Mags Royal nga nakitaan og buslot sa kasko niini.

Matod ni LTJG Michael John Encina, operations officer sa PCG 7 nga alas 3 sa hapon niadtong Sabado dihang nakadawat sila og tawag kabahin sa maong pagkasangad.

Nasayran nga giluwas ra usab ang maong mga Chinese Nationals sa niagi nga motorbanca, “Chinese nationals were safely transferred to a passing motorbanca around 3pm na din po.”

Dali kini nilang girespondehan ug anaa sa luwas nga kahimtang ang tanang Chinese Tourists lakip ang mga tripulante niini.

Nakita ang buslot nine-bysix nga buslot sa kasko niini duol sa pala-pala sa maong yate.

Nasayran nga si Roland Longakit maoy kapitan sa maong yate.

Ang pagsuroy sa kadagatan o island hopping sa tungatungna sa usa sa mga nag-unang nagdani sa mga turista nga langyaw ug lokal.

Apan gi-monitor kini sa Department of Tourism human sa pipila ka kaso sa trahedya sa kadagatan.

Atol ning pagsuwat, si Longakit mosumiter sa iyang taho bahin sa nahitabo sa kadagatan nga naglambigit og mga turista nga Chinese nationals sa naasoy nga yate.