KASLUNON NASIKOP SA BUY BUST
Moabot sa tunga sa milyon ka pesos nga balor sa drugas ang nasakmit sa Pardo police station gikan sa managuyab nga kaslunon na unta sunod buwan atol sa ilang gihimong buy bust operation sa Sitio Lomboy, Brgy. Inayawan pasado alas 3 kaadlawon niadtong Sabado.
Ang mga nasikop giila nga silang Arnie Obedoza ug Michelle Maneja nga bag-o lang namuyo sa dapit human mibalhin gikan sa Brgy. Tangke sa siyudad sa Talisay.
Matod ni P/CInsp. Regino Maramag, hepe sa Pardo police station, nga nakadawat silag impormasyon gikan sa usa ka concern citizen sa dapit labot sa ilegal nga negosyo sa duha.
Tungod niini ilang gipaubos sa validation ug surveillance ug hu- man masuta nga tinuod ang nadawat nga kasayuran ila dayon nga gilusad ang buy bust operation.
Human makatunol si Arnie Obedoza sa usa ka pakete sa gituohang shabu balor P200 nagpaila dayon sila nga pulis.
Sa pagrekisa nakuhaan pa kinig laing mga pinakete sa ilegal nga drugas samtang si Moneja nakuhaan usab og medium size sa gituohang shabu nga mobalor ang tanan sa P413,000.
Sa impormasyon nga nasagap ni Maramag nga tungod sa kahugot sa seguridad na sa Tangke, Talisay milayas na sa mga silingang barangay ang mga drug personalities.
“Nakadawat mig information nga naabot sa Inayawan ang duha nga gikan sa Tangke, kaslunon ni sila next month mao to among gi-monitor ug positive nga namaligya silang duha, didto na gyud madayon sa prisohan ang ilang kasal,” matod ni Maramag.
Samtang pasado ala una gahapon sa hapon nasikop sa Station 6 sa Cebu City Police Office ang notado na nga drug pusher sa Sitio Lawis, Barangay Pasil lakip na ang tulo ka seaman nga taga lalawigan sa Bohol.
Ang nadakpan giila nga silang Roland Rabadon 30, taga Magsasay Street nga maoy ilang target sa buy bust operation nga nakuhaan ug P60,000 sa drugas.
Lakip sa nasikop mao silang Cle Andro Teriote, Van Andre Siason, 28 ug Noel Crux Amen, 31 pulos mga seaman sa usa ka inter island cargo vessel nga naatlan nga nanuyop sud sa usa ka balay.
Nakuha kanila ang ubayubay nga pinekete sa illegal nga drugas nga mobalor ang tanan sa P60,888.
Samtang pasado alas 12 sa milabayng kaadlawon nakadakop usab ang Talamban police station og lima ka mga tawo nga nalambigit sa ilegal nga drugas sa sitio Upper Tac-an, Brgy. Budlaan sa siyudad sa Sugbo.