Kasingkasing ni Padre Pio dad-on sa Sugbo

Libuan ka mga tawo ilabi na kadtong mga deboto ni San Padre Pio sa tibuok Kabisayan ang gipaabot nga modagsa sa dakbayan sa Sugbo sunod semana nunot sa pagduaw unya sa relic niini, nga mao ang iyang kasingkasing.

Ang Santo Padre Pio Contemplative Community of Cebu (SPPCCC), nakig-alayon na sa kapulisan ug mga traffic enforcer alang sa seguridad sa tanan alang sa upat ka adlaw nga pagdagsa sa mga deboto sa Sugbo.

Usa ka gatus ka tuig karon sukad sa kasinatian ni Sto. Padre Pio sa stigmata ug 50 ka tuig nga anibersaryo sa iyang kamatayon.

Hinungdan nga daling nitugot si Cebu Archbishop Jose Palma dihang gitanyagan kini nga ang Sugbo ang mamahimong lugar nga bisitahon sa relic ni Sto. Padre Pio dinhi sa kabisay-an.

Ang relic sa santos, ang wa naunsa nga kasing-kasing niini, human kini giugkat 10 ka tuig na ang nakalabay.

Gihulagway ni bishop Palma nga dakung grasya alang sa Pilipinas nga maoy ika-upat nga nasud sa tibuok kalibutan nga duawon sa relic, ilabi na nga dungan usab kini sa pagsaulog sa Year of the Clergy and Consecrated Persons.

Nabisita na sa relic ang mga lugar sa Boston, USA, mga nasud Paraguay ug Chile.

Una kini mobisita sa Batangas, sa habig sa Luzon area, dayon sa Cebu alang sa Visayas ug ang Davao sa Mindanao.

Panghinaot ni Palma nga unta mahimong inspirasyon si Sto. Padre Pio di lang alang sa kaparian ug relihiyoso, kundi alang sa tanan.

Alang sa spiritual nga pagbag-o taliwala usab sa mga giatubang nga problema sa nasud, karon ilabi na ang daghang kaso sa bisan unsang klase sa patay.