Integrated development plan sa MCIA wa gituki sa RDC

Wala una gituki atol sa full council meeting sa Regional Development Council (RDC) sa Central Visayas ang pag-aprobar sa integrated development plan sa Mactan Cebu International Airport niadtong Biyernes sa dakbayan sa Dumaguete.

Si Glenn Anthony Soco, chairman sa Infrastructure Development Commitee sa RDC 7, nipasabot nga huwaton una nila ang endorsement gikan sa City Development Council sa kagamhanan sa siyudad sa Lapu-Lapu sa di pa ipalabang ang 50 ka tuig nga master plan sa pagpalambo sa MCIA.

Matod niya nga giduso ang integrated development plan sa MCIA atol sa ilang katapusang tigom sa IDC-RDC 7 niadtong Septiyembre 10, uban sa pipila ka mga kondisyon ug usa na niini, kinahanglan nga duna kini pagtugot gikan sa CDC sa Lapu-Lapu City Government.

“So, it’s too premature for the full council to endorse it because we are still awaiting for those documents and requirements that need to be applied,” dugang ni Soco dihang nahinabi sa Superbalita Cebu human sa tigom sa RDC.

Ang master plan naglakip sa gibana-banang 4 bilyones dolyares nga pagpalapad ug pagpalambo sa runway facilities sa tugpahanan.

Sigon ni Soco ang Mactan Cebu International Airport Authority (MCIAA) Board nitugot sa master plan sa GMR Megawide Cebu Airport Corp., alang sa tugpahanan sud sa 50 ka tuig ug ni-grant og original opponent status ubos sa public-private partnership (PPP) alang sa pagpalambo sa tibuok propiyedad apil na ang ikaduhang runway.

Apan manginahanglan una kini og pagtugot gikan sa National Economic and Development Authority (NEDA pinaagi sa pag-endurso sa RDC 7 human sa CDC.

Niadtong Hulyo ning tuiga, gibuksan na ngadto sa publiko ang ikaduha ug bag-ong terminal sa MCIA.