Di ilubong sa kalimot

Human sa 17 ka adlaw, pormal nang gihumong ang search and retrieval operations sa ground zero sa Sitio Sindulan, Barangay Tina-an, dakbayan sa Naga niadtong Sabado. Usa ka santos nga misa ang gihimo sa dapit ug prosisyon sa imahen sa patron sa dakbayan nga si St. Francis of Assisi uban sa imahen ni Sr. Sto. Niño.

Uban sa paghunong sa operasyon sa pagpangita sa mga biktima nga nalubong-buhi sa pagdahili sa yuta human kini gikonsiderar nga pulos na patay, dili usab nato ilubong sa kalimot ang maong makaluluoy nga hitabo. Naghatag kini og dakong leksiyon aron dili na masubli sa ubang dapit sa Sugbo diin daghang quarry sa mga minahan.

Ang mga hingtungdang kompaniya, mga lokal nga kagamhanan, Department of Environment and Natural Rsources (DENR) ug mga lumolupyo sa mga dapit nga dunay minahan kinahanglang sa ilang aktibong pagkabana ug pagsunod sa balaud.

Ang atong balaud wa magkuwang apan haguka lang ang pagpatuman niini tungod sa daghang konsiderasyon. Unya na mautingkay kon dunay bulilyaso, sama sa nahitabo sa Naga nga nitumaw nga dunay ‘shared responsibility’ ang tanang sektor gikan sa kompaniya sa minahan, mga residente, lokal nga kagamhanan ug hingtungdang ahensiya sa kagamhanan. Matag usa kabahin sa kalapasan o kasaypanan.

Pananglitan, ang mga molupyo ninghangyo na diay sa kanhi mayor sa dakbayan nga magpatunga sa pag-awhag sa Apo Land and Quarry Corp. (ALQC) nga dili papahawaon sa dapit nga una nang giila nga risgo sa pagpuyo. Ang DENR uban sa iyang sanga nga ahensiya mas bug-at og responsibbilidad isip tigpatuman sa ngipon sa balaud sa kalikupan.

Makabungog ang kahilom sa dapit. Mag-ampo kita nga nahiluna na ang kalag sa mga biktima. Dili nato ilubong sa kalimot, kinahanglang dunay padulngan ang imbestigayon sa landslide sa Naga.