Pamasin sa lotto

Ning atong pagsulat, ang jackpot sa 6/58 Ultra lotto niabot na sa kapin sa 900 milyones ka pesos, ang kinadakan nga jackpot prize sa lotto sa Pilipinas sukad masukad. Sa kalisod karon, ilabi na sa inflation rate nga 6.7 porsento sa buwan sa Septiyembre nunot sa pagsaka sa presyo sa mga palaliton ug sa mga produkto sa lana, daghan ang namasin sa makadaog sa lotto.

Ta-as kaayo ang linya sa mga tawo sa mga lotto outlet. Sanglit way nakadaog sa miaging Biyernes, mas modako pa ang jackpot kagabii, Dominggo. Wa kita masayod kon niabot na ba kini og usa ka bilyon ka pesos.

Di lang mga ordinaryong tawo ang namasin sa 6/58 lotto. Sumala sa mga taho, hasta si Presidente Rodrigo Duterte ug ang iyang anak, si Mayor Sarah sa Davao City, nipusta sa lotto. Si mayor Sarah niingon nga kon siya ang makadaog, iyang hatagan og 121 milyones si Senador Antonio Trillanes.

Duna koy nahibaw-an nga pundok sa mga milyonarsyo nga mipusta sa 6/49 lotto. Sa ilang kwenta-kenta, magbahin na silag tag 40 milyones kon silay makadaog. Usa sa ilang puindok nisugyot nga mangaligo silag dagat kon makadaog. Usa sa ilang pundok niingon, “Nabuang mo, gusto gyud mong mangalumos ta?”

Sumala pa sa mga batid sa matematika, ang tsansa sa pagdaog sa jackpot sa 6/58 lotto lausan sa 40,475,358. sa mga pasiaw pa, mas dakon pag purohan nga maigo kas kilat og kaduha kay sa makadaog sa lotto jackpot.

Apan kinsay nasayod. Wa pa man sab ta kabalita og tawo nga naigo sa kilat nga nakadaog sa lotto. Ungon pa sa taga Cabadiangan, ang makauna lang – kilat o jackpot sa Uktra lotto.

Dunay tulo ka patay nga niabot sa punerarya, ambot kon kang Dodong Maturan ba kadto. Ang tulo pulos nagngisi. Nagutana ang embalmer sa mga tagtungod kon nganong ang maong mga minatay.

Mao kini ang iyang nasayran. Ang usa nagningsi kay giatake ug namatay sa ibabaw sa kamay, samtang nakighilawas sa iyang kabit. Ang ikaduha nagngisi kay giatake sa pagkahibawo nga nakadaog siya sa jackpot sa lotto. Ang ikatulo nagngisi kay gikilatan, abi niyag gikodakan siya.