Express lane para sa mga motorista

Sa mga supermarket may gitagana nga express lane alang sa mga senior citizen bakol ug mga mabdos. Gitumong kini aron mahimong sayon alang nila ang paghingpit sa ilang mga transaksiyon sa tindahan atol sa ilang pagpangumpra ngalibre batok sa kahasol nga sagad masinati.

Mao sab ni ang gitanyag sa ubang mga establismento isip kabahin sa ilang dakong pagpakabana sa mga senior nga mobayad o mohimo og transaction sa ilang mga negosyo.

Posibli ba nga ang ideya sa express lane hubaron sa laing paagi aron nga makatabang sa kahasol nga giantos sa ubang mga tawo.

Sama sa sugyot sa ubang motorista nga kong epiktibo ang express lane para ning maong mga establismento asay maayo og tun-an ang posibilidad nga kining express lane ganiton nga paagi pagpaminos sa problema sa trapiko sa usa ka dapit.

Express lane sa mga jeepney og ubang sakyanan nga sa matag adlaw nga tanan nag-antos sa dakong suliran sa trapiko.

Nag-una niini mao ang mga sakyanan nga mosubay sa dalan Tagonol sa dakbayan sa Sugbo.

Mao ni ang mga motorista nga nahasol og maayo tungod sa nagpadayon nga trabaho sa may Natalio Bacalso Avenue habig sa Barangay Mambaling og Basak San Nicolas.

Pananglit ang mga sakyanan nga mosubay sa dalan Tagunol matag alas 6 sa buntag.

Mao ni ang oras nga maghuot og maayo ang mga sakyanan nga mopadung sa downtown o uptown area.

Ang sugyot ingon niini. Sa may eskina sa dalan Vestil diin nahimutang ang traffic light mano mano na ang pagpahunong o pagpadagan sa mga sakyanan.

Sa ato pa di na suga kun di ang traffic enforcer na ang magigo kanus-a ang stop ug go.

Ang mga traffic enforcer nga gidistino sa eskina Tabada ug Cabreros maoy modawat sa abiso gikan sa enforcer sa eskina Vestil pinaagi sa hand held radio nga magsugod na ang oras sa express lane.

Sa samang higayon ang mga PUJ driver moabiso sab sa ilang mga pasahero nga kong magsugod na ang express ang designated jeepney stop mao ang sa may Ybañez lahos na sa unahan sa may litsonan. May enforcer sab nga nadistino didto. Wa nay maka pick up og pasahero unyag sugod sa express.

Sa ingon niini nga paagi kusog ang dagan ang mga sakyanan.

Ang paagi man gud karon ang traffic light mao ray giagad mao nga nag aginod.

Importanting punto ngano nga patas-an og oras ang habig sa may Tagunol kini tungod kay nia dinhi nagdasok ang mga PUJ nga gisakyan sa mga estudyante, mamumuo og ubang pasahero nga kanunayng nag-apas sa oras. Apil na ang ubang motorista.

Ang pangutana unsaon man tong mga pasahero nga manaug nga maatlan sa express.

Ang para San Roque moantos og gamay kay adto man sila manaug sa may Ybañez.

Ang para Cabreros o Tabada mao gihapon ang mahitabo pero kong mag double ride sila hamugaway ang pabalik padung sa ilang distinasyon.

Basi sa sugyot ipatuman ni gikan sa alas sa 6 sa buntag depende sa sitwasyon, hangtod sa oras nga di na bumper to bumper ang kahimtang sa mga sakyanan. Kay kong makalusot naman gud ang mga sakyanan gikan sa Tagunol pewerte gyung mingawa ang dalan C. Padilla.

Sayod niana ang mga motorista. Hinuon naa pay daghang pangutana ang angayng tubagon sa maong sugyot.

Siguro sa mga eksperto sa trapiko dugang pagtoon ang angay nga himoon. Pero para nako angay kining patalinghugan.

Basin diay kining pinobre nga sugyot makatabang sa nagka grabe nga problema sa trapiko sa maong dapit.

Ug posibli sab nga solusyon sa kahuot sa dagan sa trapiko sa ubang karsada.