We should face reality
Sa pagpanglabay sa mga adlaw, inanay kong naka-move on. Apan ang love ko kang Amir nagpabilin sa akong kasingkasing. “Midaot ka man, An?” Usa ka udto nag nag-research ko sa akong school assignment sa library, giduol ko ni Marlon. Duna sab diay siyay gibasang libro sa library. Mitapad siyag lingkod nako.
“Di gyud kalikayan, Mar. You know bitaw nga pressure gyud kaayo ning pag-eskuwela sa college.”
Hapit di ko makatan-aw kang Marlon. Nabalaka ko nga iyang madeskubrehan ang tinuod nga hinungdan sa paghugo sa akong lawas.
Miginhawa pag-ayo si Marlon. Nakaduko ko.
“Look at me, Anna. Di kalimdan ang unsa man nga gibati. Sure ko nga si Amir ang rason maong naingon ana ang imong lawas.”
Ako na sab ang miginhawa pag-ayo. Ngano ba tuod nga limdan ko man si Marlon nga nagpabilin man ang among friendship bisag gipakyas ko siya sa iyang gugma nako? “Di ko makalimot niya, Mar.” Kanindot na gyud untang ihilak, uy, aron ikapagawas ko ang akong kaguol. Apan angay lang gyud kong magpugong sa akong kaugalingon. Di ko angay magpadala sa akong emosyon.
“Barogi ang unsa man nga imong gibati, Anna. Ayaw kini talikdi. Mag-antos ka lang. Sure ko nga dawaton ka sa mga ginikanan ug mga igsuon ni Amir. Nakaila man ta nila sa atong lungsod, di ba? Mga buotan sila ug di mata-pobre.”
Nakatan-aw ko pag-ayo kang Marlon. Nag-smile siya nako. Nakapanglingo na lang ko ug nahikatawa kog hinay.
Usa ka gabii sa Sabado, mao pay akong pag-abot gikan sa siyudad. Every weekend ko mopauli sa among lungsod. Human kog panihapon, mosulod na unta ko sa akong kuwarto apan nahiabot si Amir. Namisita siya nako. Kusog ang pagbutuk-butok sa akong dughan nga miatubang niya sa gamay namong sala.
“An, nia ko aron ipadayag kog usab ang akong love nimo.”
Wa gyud diay sa plano ni Amir ang paghunong sa pagpangulitawo nako. Wa ko makatingog dihang miduol siya nako. Wa ko makalihok dihang kalit niyang gikuptan ang akong kamot.
“Let’s face reality nga duna tay love sa usag usa, An. I’ll try my very best nga mahigugmag laing girl. But ikaw ra gyud ang akong love.”
Wa na gyud ko makapugong sa akong kaugalingon, gisugot ko na gyud si Amir.
(KATAPUSAN)