Sa menteryo ibalik

Alas siyete sa buntag misakay ko og traysikol paingon sa Jolly Bee sa dalan Rizal. Pag-abot sa ikaduhang eskina may mipara nga usa ka lalake nga bagison og nawong. Didto kini molingkod sa luyo nga lingkuranan sa traysikol

“Asa ka paingon, boss?” sukna sa drayber.

“Ihatod ko, Do, sa Jolly Bee,” tubag sa lalake.

Apan wa pa gani mi kaabot sa Jolly Bee, gipahunong sa lalake ang traysikol ug mikawas. Dihang miaksyon na kini paglakaw gitawag kini sa drayber, “Ang imong pasahe, boss!”

“Aw, libre lamang usa karon, Do!” gikomedyahan ko siya.

“Dili mahimo. Buntag pa, wala pa koy kita.”

“Kon dili ka mosugot ibalik lang ko didtos ako gigikanan kay magkuha ko ug pasahe.” Labihang laguta sa drayber. mitubag kini, “Wa ka kuyapi? Sa Menteryo tika ibalik!”

Igo lang nakahuman pagsulti niadto ang drayber milanog ang tulo ka buto sa kalibre 45 gikan sa nagsunod namong motor nga may duha ka lalake nga nagsakay. Usa ka lalake nga naglakaw naigo sa bala ang ulo ug dughan mikirig ug natumba sa daplin sa dalan, patay.

Unya ang drayber sa traysikol midali-dali pagpadagan sa tray- sikol paingon sa unahan hangtod nakaabot mi sa Jolly Bee nga labihan namong lisanga. Human ko makabayad sa pasahe, mikawas ko sa traysikol.

Sumala sa imbestigasyon, kadtong tawhana nga nailhan sa kapulisan nga ginganlag Mokong (Demokreto de Palaypay) usa diay ka public Enemy No.1. ‘Wanted’ siya sa daghang mga kaso nga rape, murder, kidnapping, robbery, pagpayuhot sa gidili nga drugas ug uban pa.

May mga hungihong nga basin ang nagpapusil kang Mokong mao ang pinanser sa ginadiling mga drugas kay wala kuno maka-remit sa halin sa ilegal nga drugas nga gipa-baligya niini. Daghan usab ang nag-ingon nga gidumtan si Mokong sa mga tawo nga iyang gibinuangan. Gihimo kunong kalingawan ni Mokong ang pag-binuang bisan sa suod niyang mga kaila.

Dihay usa ka higayon nga usa sa iyang mga kaila nga ginganlag Agaton, giagda ni Mokong nga mag inom sila sa usa ka restawran. Wala balibari ni Agaton si Mokong kay mipasalig man ang naulahi nga maoy mobayad sa ilang mainom ug makaon kay nakadaog kuno siya sa SWERTRES.

Sa restawran lamiang mga pagkaon ug stateside nga ilimnon ang ilang gi-order. Unya nangaon ug nanginom sila. Sa hapit na sila mahuman, nananghid si Mokong nga moadto sa Comfort Room aron pagtubag sa sugo sa lawas. Apan nabawo sa paghinulat si Agaton kay si Mokong wala na gayud mobalik.

Napugos si Agaton pagbayad sa ilang gi-order. Maayo gani kay napaigo ang kuwarta nga iyang dala. Labihan gyung laguta ni Agaton ug nagbahad kini sa hilom nga iyang pusilon si Mokong.

Tungod usab kang Mokong napriso si Balikwin og usa ka semana. Siya ang gitudlo ni Mokong nga maoy nagkawat sa motor nga Honda sa ilang silingan. Kini si Balikwin higala ni Mokong kaniadto; apan karon kaaway na kuno. Maayo gani kay nadakpan ang tinuod nga kawatan ug si Balikwin gibuhian.

Daghan pang ubang mga binuang nga gibuhat ni Mokong. Gituohan sa kadaghanan nga usa sa iyang mga gibinuangan ang mipusil kaniya. Apan kinsa man ang responsable sa kamatayon ni Mokong? Usa kini ka TIGMO. Hangtod karon ang kapulisan wala pay nakita nga suspek o person of interest nga maoy manubag sa kamatayon ni Mokong. (KATAPUSAN)