MCGREGOR NAPILDI; KAGUBOT MIHUGPA

Gubot pa sa lukot ang senaryo human napilde si Conor McGregor sa iyang pagbalik og away sa sulod sa octagon pinaagi sa rear naked choke batok kang lightweight

champion Khabib Nurmagomedov kagahapon sa UFC 229 sa Las Vegas, USA.

Human ni-tapout si McGregor sa 4th round, si Nurmagomedov migawas sa octagon ug sa wala damha, nahitabo ang grabeng gubot ug gitabangan si Nurmagomedov sa mga kauban ni McGregor.

Samtang padayon ang kagubot sa gawas sa octagon, adunay duha ka mga tawo nga gituohang gikan sa kampo ni Nurmagomedov ang misulod sa octagon aron atakihon si McGregor.

Ang grabeng gubot nakakawat og mas dakong atensyon kumpara sa kadaugan ni Nurmagomedov batok sa mixed martial arts superstar.

“Been doing this for 18 years, and (on) the biggest night ever, I couldn’t be more disappointed,” batbat ni UFC President Dana White. “I’m not even mad. I’m just really disappointed.”

Ang premyo ni Nurmagomedov gipugngan una sa Nevada Athletic Commission ug nagdepende pa kini sa resulta sa ipahigayong imbestigasyon, matod ni White.

Gibutyag ni White nga tungod sa nahitabo, posible sab nilang tangtangan og bakus si Nurmagomedov, kinsa wala’y pilde sulod sa 27 ka mga away.

Adunay mga kauban si Nurmagomedov ang nabilanggo apan gibuhian ra kini sa kapulisan tungod kay wala mipasaka og kaso si McGregor, kinsa

natagak sa 21-4 nga rekord.

“If he gets suspended, it depends on how long his suspension is,” pasabot ni White.

“And if it’s a long suspension, yeah, he’s probably going to get it stripped.”

Sa post-fight press conference, mibutho og kadiyot si Nurmagomedov ug nangayo kini’g pasaylo sa Nevada State Athletic Commission apan iyang gisaway ang mga kantiyaw ni McGregor sa wala pa ang ilang away.

“You cannot talk about religion. You cannot talk about nation. You cannot talk about this now,” kaligutgot ni Nurmagomedov, kinsa usa ka Russian. Gibutyag sab ni Nurmagomedov nga taliwala sa nahitabo, nakadawat siya’g congratulatory phone call gikan kang Russian President Vladimir Putin.

/ AP ■ HUSTO NA. Si Khabib Nurmagomedov, tuo, nga giuwang ni referee Herb Dean human niya ma-choke si Conor McGregor, naglingkod, atol sa ilang lightweight title mixed martial arts fight sa UFC 229 didto sa Las Vegas kagahapon. Si Nurmagomedov midaog sa away pinaagi sa submission sa fourth round aron pagdepensa sa titulo. Apan human sa away mihugpa ang kagubot sulod sa arena.