MGA OPISYAL SA TEJERO NABALAKA
Mga opisyal sa Barangay Tejero, dakbayan sa Sugbo naalarma human nabalita nga dunay usa sa ilang kauban nga gidudahang protektor sa tulo ka managsuong babaye nga giilang Tres Marias sa ilegal nga drugas nga nadakpan sa kapulisan atol sa one time, big time (OTBT) operations sa milabayng semana.
Ang Police Regional Office (PRO) 7 nilusad sa halapad nga operasyon ug ang Tres Marias sa Tejero nasikop human gidudahang ‘hagbonganan’ sa
supply sa ilegal nga drugas ug sila usab ang mobahinbahin niini sa mga drug pusher.
Sa pakisusi sa kapulisan, nadiskubrehan nga ang managsuon posible giduphan sa usa ka politiko sa barangay tungod sa ilang nakuhang ebidensya.
Human makabati sa balita, nabalaka si Brgy. Kapitan Hermogenes Galang Jr. ug nipatawag sa mga konsehal sa barangay aron tukion ang nanggawas nga balita.
Nakahukom sila sa pakigkita sa direktor sa PRO-7 nga si Chief Supt. Debold Sinas.
“Gipasaligan hinuon sila ni Sinas nga dili sila ang gidudahan nga protektor sa magsuong durugista ug wala siya makasaway kang Galang tungod sa gihatag niini nga suporta sa kapulisan sa syudad sa Sugbo.
Atol sa OTBT sa miaging semana,
dunay mga opisyal sa barangay ang niabag sa mga pulis pinaagi sa pagsaksi sa anti-drug operation nga nahimong malampuson. “Kini sila I am very happy
with them in fact katong pag raid sa ilaha naay barangay
officials nga mi support nila,” matod ni Sinas.
Giangkon ni Galang nga usa ka adlaw sa wala pa gilusad ang lapad nga anti-drug operation miadto sa iyang opisina ang tulo ka managsuon nga mipahibawo nga wala na sila malambigit sa ilegal nga drugas.
Human sa panagtigom, gihagit dayon ni Sinas si Galang ug mga kauban ni ni nga si Gary Lao sa Cebu Office of Substance Abuse Prevention (Cosap) nga mopaubos sa drug test nga gisanong usab dayon sa mga bisita aron pagmatuod nga dili sila tiggamitan sa illegal drugs.