Mga bakwit sa Brgy. Lagtang nasagmuyo
Sa Talisay City Hall mopuyo ang dul-an sa usa ka gatos nga bakwit gikan sa Sitio Tigib ug Sitio Burlas, Barangay Lagtang.
Kini maoy hulga ni Nora Abatayo, lider sa mga residente sa Tigib, Lagtang nga naapektuhan sa dakong quarry operations sa QM Builders.
Si Abatayo, uban sa mga lumolupyo sa lugar, nanawagan kini sa mga opisyal sa Talisay nga ipahunong ang quarry operation kay peligro sa ilang kinabuhi ug sa ubang nanimuyo sanglit dilikado na ang lugar nga simbako masusama sa landslide sa Tinaan, dakbayan sa Naga.
Matod ni Abatayo, nga nahinabi sa Superbalita Cebu nga dili maayo karon ang ilang sitwasyon nga gipapuyo sa Tabunok Sports Complex.
Tungod kay sukad sila gipugos pagpa-bakwit niadtong Oktubre 1, nangasakit na sila ug nagkalibanga, lakip sa mga bata nagbalikbalik ang mga hilanat tungod sa ka init og sa lugar.
Wala pay klarong evacuation center nga mahatag kanila hibungdan nga naglisod sila sa ilang inadlaw-adlaw nga panginabuhi.
Gipadayag niini nga kun di sila mahatagan og relocation site mobakwit sila pero sa Talisay City Hall mopuyo.
Si Konsehal Richard Francis Aznar, pangu sa committee on health sa konseho nga nahinabi sa mga tigbalita, niingon nga kagahapon sayo sa buntag mipadala sila sa Dengue Task Force aron sa paglimpiyo sa lugar masiguro nga walay stagnant water nga maitlogan sa lamok nga magdala sa sakit nga dengue.