Hitman sa sindikato mitipi ni Bas: PRO 7
Direktor sa Police Regional Office (PRO) 7 niingon nga grupo sa mga durugista sa siyudad sa Talisay nga naapektohan sa subsob nga kampanya sa ilegal nga drugas ang nipapatay kang kanhi Lagtang Barangay kapitan Ferdinand Bas sa miaging adlaw sa Barangay Simala, lungsod sa Sibonga.
Matod niya, ang mga big time drug group sa Central Visayas adunay kaugalingong hitman nga molikida sa ilang kaatbang sa ilegal nga negosyo ug naila usab ang biktima nga moduwa sa ilegal nga drugas.
Dili na kini bag-o pa sanglit daghan na sa mga insidente sa Sugbo sa dihang wala pa siya mahimong PRO-7 director nga nag-unay na ang mga iligalista tungod sa ilang panag ribal sa negosyo.
“Seguro naay naapektohan sa among anti-drug operations mao ning kaning known personalities biglang nag tagoan kay ang mga sindikato or mga time pushers naa man pud na silay mga operative pud ba, mao na ang among gitan-aw karon.” matod ni Chief Supt. Debold Sinas sa PRO 7.
Natingala si Sinas nganong nagtagotago na si Bas sa lungsod sa Sibonga ug dako ang iyang pagduda nga nakadawat na kinig hulga sa kinabuhi.
Nagpadayon karon ang Sibonga PNP sa ilang pagpalawom sa imbestigasyon sa kamatayon sa kaso ni Bas nga unang ginganlan ni Presidente Rodrigo Duterte nga naa sa narco list.
Matod ni Sr. Supt. Manuel Abrugena, hepe sa Cebu Provincial Police Office (CPPO), nga sa pagkakaron tulo ka mga angulo ang ilang gisubay kini may labot sa politika tungod sa nagsingabot nga eleksyon, personal nga atraso ug ang kalambigitan niini sa illegal nga drugas.
Gimandoan na ang kapulisan sa Sibonga nga mokuhag pamahayag sa mga silingang panimalay sa sitio Dumlog, Simala sa posibling nakakita sa mga suspek sa wala pa ang pagpamusil.
“Tinitingnan po natin kase allegedly after po ng pagka matay ng kanyang anak is umalis po sya ng talisay and he preferred to stay there in Sibonga,” matod ni Abrugena.
Suwayan sa mga imbestigador nga makig-alayon sa pamilya ni Bas aron masayran nganong nag tagotago kini human mapatay ang iyang anak niadtong buwan sa Hulyo ning tuiga.