Barko nasangad, mga pasahero luwas

Ipaubos sa assessment ang M/V South Pacific nga nasangad sa kadagatan sa Danajon Bank, Bohol kagahapon sa kaadlawon nga paingon unta sa pantalan sa Sugbo.

Luwas hinuon ang tanang 67 ka mga pasahero diin ang Philippine Coast Guard (PCG) 7 pinaagi sa vessel niini ang mi-rescue aron madala kini sa Sugbo.

Ang M/V South Pacific gikan kini sa pantalan sa Bato, Leyte diin nibiya kini pasado alas 9 sa gabii niadtong Lunes.

Moabot unta kini sa Sugbo alas 4 sa kaadlawon kagahapon.

Matod ni LTJG Michael John Encina, nga ala 1 sa kaadlawon nasangad ang maong barko.

Pasado alas 8 sa buntag kagahapon dihang nabalhin na ang tanang pasahero sa MRRV 4404, ang vessel sa PCG midala niini sa Aduana Wharf sa Pier 1, dakbayan sa Sugbo alas 10:30 sa buntag.

Gawas sa medical team nga gipadala sa Coast Guard aron masiguro nga aduna’y atensyon medikal ang mga pasahero, nihimo usab og inisyal nga underwater inspection ang mga divers sa PCG ingon man ang Marine Environmental Protection Personnel (MEPU) sa aron masiguro nga wala’y oil spill nga nahitabo. Hinuon, negatibo ang resulta.

Matod ni Encina nga ang MARINA mao ang mo-assess sa barko sa di pa kini makabiyahe pagbalik.

Dihang naabot sa Sugbo ang mga pasahero, gitunolan usab kini og pagkaon sa PCG.

Ang sister ship sa M/V South Pacific mao ang mobira sa maong barko pabalik sa pantalan.