Chan posibling modagan pagka mayor sa Lapu; grupo ni Radaza andam na
Magdepende ang desisyon ni Pajo Barangay Kapitan Junard Chan ngadto sa Oponganon kon magpapili siya pagka-Mayor sa LapuLapu atol unya sa midterm election sunod tuig.
Samtang gibutyag ni Chan nga si Secretary Adelino Sitoy, Presidential Adviser on Legislative Affairs, maoy mihagad kaniya nga magpapili pagka-mayor sa naasoyng dakbayan.
Gawas sa Oponganon ug Pajoanon iya sab nga konsultahon ang sakop sa iyang pamilya ilabi na nga nagreklamo ang iyang mga anak sa kakuwang sa iyang panahon ngadto kanila human sa iyang paglingkod isip kapitan sa Pajo niadtong 2013.
Apan adunay ubang konstituwente nga nasud-ong ni Chan sa iyang gihimong pagpangonsulta ang nangandoy og kausaban og siya maoy nakita nga alternatibo alang niini nga gihatagan sab niya og konsiderasyon sa mamahimo unya niyang desisyon.
Gitug-an sa kapitan nga kapin na sa katunga sa mga barangay sa mainland Lapu-Lapu ang iyang gikonsulta ug nagkinahanglan pa siya og dugang panahon aron sa pagsud-ong sa uban pang mga barangay ilabi na ngadto sa isla sa Olango.
Sa habig ni Lapu-Lapu City Mayor Paz Radaza, kinsa naa na sa iyang katapusang termino una nang namahayag nga adunay himuong official announcement ang ilang grupo sa tanan nilang kandidato sud ning semanaha sa dili pa sila moduso sa ilang certificate of candidacy (COC).
Ang filing sa COCs magsugod karong Oktubre 11, 12, 15, 16 ug 17. Kahinumduman nga nakig-atbang niadtong 2010 election ni Chan batok ni Radaza apan naparot sa mayoralty race.
I am open (mokandidato pagkamayor) but subject to consultation sa mga tawo,”
tipik sa pamahayag ni kapitan Chan.