Magpale: Bakud party, NPC pabilin gihapong kaalyado
Pabilin nga mag-alyansa alang sa 2019 elections ang Barug Alang sa Kauswagan ug Demokrasiya (BAKUD) Party ug ang Nationalist People’s Coalition (NPC).
Kini maoy gitug-an ni Bise Gob. Agnes Magpale, kinsa maoy usa sa mga sinaligan nga sakop sa BAKUD ug maoy kandidato pagka-bise gobernador pares ni Gob. Hilario Davide III.
Matod ni Magpale nga sama niadtong 2016 presidential elections, suportahan sa BAKUD ang mga national candidates sa NPC samtang ang maong nasudnong partido mosuporta usab nila nga mga local nga kandidato dinhi sa Sugbo, ilabi na sa 5th district.
Sigun sa bise gobernador, ang NPC mao unyay mohatag kanila ug Certificate of Nomination and Acceptance (CONA), nga maoy ilang isumitir kauban sa ilang certificates of candidacy.
Wala hinuoy nakitang kakulian si Magpale sa panag-tandem nila ni Gob. Davide, bisan paman ug sakop ang gobernador sa Liberal Party (LP). Niadtong 2016 elections, mao usab kini ang nahitabo.
Matod ni Magpale, lain-lain usab ang partido sa ilang mga kaalyado nga modagan pagka-board member.
“Alegre ni rong eleksiyona,” nagkanayon si Magpale.
Ang kanhi provincial chairman sa NPC dinhi sa Sugbo nga si kanhi kongresista ug kanhi Tourism Secretary Ace Durano nitug-an nga bag-o lang gitudlo puli kaniya ang iyang igsuon nga si 5th District Representative Red Durano.
Sa usa ka text message, gipadayag ni Ace nga sakop gihapon siya sa NPC apan dili na siya aktibo sa politika karon maoy hinungdan nga si Red na ang gihimo nga NPC provincial chairman sa Sugbo.
“Member gihapon but dili man ta active sa politica karung mga panahuna. For this upcoming election, bago lang gi-appoint si Cong. Red as NPC provincial chairman,” pagtug-an ni Ace.
Sa nasayran, si Ace nagsilbing campaign manager sa presidential ug vice presidential bet sa NPC sa 2016 elections nga mao silang Sen. Grace Poe ug Sen. Chiz Escudero.