Pulitika mibukal
Mipatuman ang kapulisan sa hightened alert isip pagpangandam sa pagduso sa certificate of candidacy (COC) sugod ugmang adlawa, timaan sa pagsugod sa pagbukal sa kawa sa pulitika alang sa mid-term elections karong Mayo sunod tuig. Kinsa kaha ang unang mopasaka sa ilang COC sa buhatan sa Commission on Election (Comelec)?
Ang mid-term elections mas alegre ug sibaw human mao kini ang pagpili sa naa sa tungatungang mga posisyon sa oganisasyon sa kagamhanan, gikan sa katunga sa mga sakop sa Senado o 12 ka senador, mga district ug sectoral nga representante sa Ubos Balay-Balauranan ug mga mayor uban sa iyang bise ug mga konsehal. Dili ba daghang interesado sa nahisgotang mga posisyon? Seguradong magbaha ma usab ang kuwarta nga panghaylo sa boto. Init ang piniliay.
Bantayan nato kon kinsa ang mag-una sa pagduso sa COCs human tataw nga sila ang mas interesado ug klaro sa ilang plano sa pagkandidato. Dili ang kadidato nga nagduhaduha o naghatahata sa pagduso sa COC. Dunay uban nga adto na ulahing bahin o kataposang gutlo sa deadline sa pagpadawat sa COC. Naniid pa pag-ayo sa higayon, daghang konsiderasyon o napugos lang sa pagkandidato tungod sa daghang pressure sa pamilya o partido sa pulitika.
Nagpasabot lang kini nga ang sayong mopasa sa ilang COC klaro sa ilang tinguha sa pagserbisyo sa katawhan ug seguradong andam na sa ilang makinarya sa kampanya. Usa kini sa mga timailhan nga maggiya kanato sa pagpilisa sa usa ka maayong lider ug angay nga hatagan sa atong balaang boto.
Gikan karon, ang naandang checkpoints sa kapulisan matag karon ug unya mas mapun-an kini tungod sa mandato gikan sa Comelec alang sa pagmintinar sa kahusay ug kalinaw.
Manghinaut kita nga ang pabukal sa kawa sa pulitika karon dili moawas sa limitasyon. Moabag kita sa awtoridad aron mas epektibo ang ilang operasyon sa kalinaw.