Criminal city na ang Cebu City?
Imbes ang gibantog nga ngalan nga “Queen City of the South” (Harang Dakbayan sa Habagatan) ang Cebu City may bag-o nang pagya--- the criminal city of the south.
Kini tungod sa patay nga morag kada adlaw na lang. Mikurog na ang tanan sa kahadlok! Si Kongresista Bebot Abellanosa nakatuaw: “Are they killing everybody?”
Giingon nga linugdangan sa drug war. Larawan sa kapintas sa pagpanggukod sa mga drug personalities. Tuod, everybody sa drug trade patyon.
Morag ang mando nga way mahabilin kanila. Ang killers mga hitmen nga sinugo sa kapulisan. May nagtuo nga nag-unay lang ang drug personalities. Karon mga pulis nay hitmen.
Sa Malubog rub-out diin 5 ang patay, ang mga pulis maoy gitumbok sa duha ka mga survivor nga nakaipsot. Sila Sharmaine Poran ug Antonio Ruiz Berande.
Kon tinuod ni lupig pay mga matadero sa karnihan ang mga pulis nga involved sa maong krimen. Wa nay balaod, palabihon na ang kapintas sa tuyo.
Pabor ko sa drug war, apan di sa mga paagi nga gipakita ang way pagtahod sa dignidad ug kabililhon sa tawo. Ihawon lang morag manok nga way unsa-unsa.
Kon mapatay kay misukol dunay justification. Ang mga pulis dunay kinabuhi nga panalipdan sad alang sa pamilya ug mga minahal nga sila may kaakuhan.
Ang mabasol sad ning kamatay mao ang drug personalities. Nahibawo nga nag-ungaw na sila sa kamatayon sa ilang drug trade nagpadayon lang gihapon.
Makaingon ta nga tagam! Apan naay daghan nga tinuoray sad nga nagbag-o. Nagpa-rehabilitate ug limpyo na ang kinabuhi sukad sa ilang pag-surrender.
Dakong hagit ni karon sa atong kapulisan pagtahi sa nabungkas natong kahusay ug kalinaw sa siyudad. Unsaon nila sa paghimo ila na kining tahas.
Mabawi kaha ang dautang imahen sa atong dakbayan? Apan matod ni Secretary Puyat sa Turismo bisan sa kamatay inilog gihapon ang Sugbo sa mga turista.