GIRLIE LAPINIDLASPIÑAS
Nanuktok na sa TnT semi-finals
Daghan sa mga beteranong musikero ug mga mahiligon sa kantang Bisaya ang nalipay ug nibati og garbo sa dakong dungog na usab nga gihatag ni Girlie Lapinid-Laspiñas sa Sugbo isip defending champion karon sa Tawag ng Tanghalan sa It’s Showtime ug duha na lang kadaug pasok na siya sa semi-finals.
Ang Cebuana singer unang nikulit og pangan niadtong dekada `80 dihang nikampiyon siya sa Superwheel Search for Singing Star sa kaulohan.
Si Girlie Lapinid- Laspiñas ang bugtong interpreter usab sa kasaysayan sa Cebu Pop Music Festival nga dunay pinakadaghan og daug nga naglakip sa upat ka
grand prize ug best interpreter.
Tungod sa Cebu Pop, iyang nahimamat ug nahimong bana si Jun Laspiñas, kinsa gisaaran karon sa phenomenal star Vice Ganda nga maoy mopalit ug mobayad sa iyang prosthetic legs.
Sa tinuod, dili basta-basta ang pamilyang Laspiñas sanglit sila ang nanag-iya sa Mutya Orchestra ug sa kanhi recording studio nila sa Mabolo nga kanunay gidagsa sa mga musikero. Pila sad ka dekada nga ilang gihuptan ang Cebu Pop ubos sa landong sa Cebu Arts Foundation Inc.
Apan tuig 2004 pa to dihang katapusan nakong nadungog ang Mutya Orchestra nga niduyog sa Cebu Pop. Daghan nang mga kausaban ug kon si Girlie pa, “daghan na sad ang nitaliwan.”
Ang wa ra mausab ang iyang bulawanong tingog nga sama sa linyang “gugmang putli mao ray bahandi” nga padayong misidlak luyo sa mga alimpulos sa kinabuhi. Girlie Lapinid- Laspiñas, Ssssuper Ka!
Unsay naka-inspire nimo moapil sa Tawag ng Tanghalan (TnT)?
Ang akong mga anak kay sila gyud maoy sige og ingon nga mo-audition lagi ko sa Tawag ng Tanghalan. Three times ko nabalibad kay conflict sa akong work ang audition schedule. First ni nimo niapil og balik og national singing competition since Superwheel?
Yes, mao ni ang first nako apil og balik sa national human atong Superwheel. If im not mistaken, 1983 pa to.
Naka-feel ka ba og pressure karon to make it to the semis?
Naka-feel gyud ko’g pressure. Lahi ra jud ni sa uban nga singing contest nga akong naapilan sa una.
Unsay imong preparation as TnT’s defending champion?
Wala ra man kaayo. Pray lang gyud. Ang Ginoo ra’y magbuot sa tanan. I will just sing from the heart. I know God is listening.
Kinsay kauban nimo karon sa Manila?
Nag-inusara ra ko pero nag-sige mi og communicate sa akong family especially ni Jun.
Unsay update sa gisaad ni Vice Ganda nga prosthetic legs?
Updates about sa prosthesis ni Jun, nag-coordinate na mi with the staff of Vice Ganda kay palargahon si Jun sa Manila para adto siya sukdan ug taoran og tiil. Dapat duna daw duha ka companions si Jun. Akong son-in-law maoy iyang kauban.
Niunsa man si Jun?
Lipay kaayo nga hapit na siya makalakaw og balik. Natuman na jud among pangandoy nga makalakaw na siya.
Unsay gikabisehan ni Jun karon?
Nagtuon siya og recording techniques kay nagplano mi nga among balikon ang recording studio diri sa balay.
Naa pa ba gihapon ang Mutya Orchestra?
Wala naman jud kaayo bookings sa Mutya Orchestra but we are still in contact with the musicians. Ang uban tawon, nipanaw na. Sa pagkakaron, nagplano mi nga i-upgrade ang Mutya Sounds and Lights. Dako-dako jud ang kinahanglan nga budget para maka-upgrade mi.
Before ka ni-decide mo-join sa TnT, unsay imong gika-busyhan?
Before joining TnT, I was busy with my clients sa bookkeeping. Atiman ni Jun ug sa akong 2 ka mga apo.
Naa na diay ka’y mga apo?
Oo, anak sa akong eldest daughter, Cheryl (28 yrs old). Naa silay 2 years old son, Jessie Emmanuel with boxing champ Jessie Cris Rosales. Magpakasal sila next year puhon. My second daughter, Claire (27) is a Pediatric Nurse sa Chong Hua Hospital and married to Neil Carzano. Naa silay 5 years old daughter, Kourtney Therese. Ang among ikatulo si Cesar Laspinas III (21), nursing student sa UV Charles. Ang among kinamanghuran (15), Grade 8 Seminarian sa Pope John Paul Seminary.
At this point in your life, naa pa ba ka’y gustong i-prove or ma-achieve?
I just want to prove that age is never a hindrance in chasing our dreams. Kung talent jud nimo, di jud rason ang edad. For as long as I can sing, I will always sing, to let them know that I’m still here. Girlie is still here!