Love is a stranger
Gisundan kog tan-aw ang babaye. Nagbakho na siya ug nagdagan nga misulod sa hotel. Gitan-aw ko ang lalaki. Nagpabilin siya sa baybayon. Ning tungora nagyaka na siya sa balas. Naglantaw siya sa lawod. Morag dunay gihunahuna pag-ayo. Morag wa siyay plano nga sundan ang babaye, aw iyang girlfriend.
Mikalit man lang? Hilom kong nakaingon. Kaganina sweet kaayo sila. Nagginukdanay sa baybayon. Nagginaksanay ug naghinagkanay sa lips samtang nagkaligiray sa balas. Ug karon, nahimong masulub-on ang ilang kinabuhi. Haayyy! Ang gugma pagkalisod sabton. Unya nakapangagho ko.
May untag pulos kalipay ang maangkon sa gugma? Naa man say kasakit nga hapit na lang ikamatay! Nakaingon ko sa akong kaugalingon. Parehas nako. Morag mamatay na ko sa kaguol sa pagminyo ugma sa akong boyfriend nga giisip kong my one and only. Ah, di kami para sa usag usa. Angay ko lang kining dawaton. Angay ko lang isipon nga usa ka sugal ang gugma, dunay modaog, ug duna say mapilde.
Ug ning akong paghigugma kang Rowan wa ko magmadaugon. Pildero ko.
Nakapanglingo ko nga mipadayon sa pagsuruy-suroy sa baybayon. Gilabyan ko ang lalaki nga morag dunay gipangita sa lawod, nagsigeg lantaw. Ambot kon unsay naa sa iyang hunahuna? Agpason ba niya ang iyang girlfriend o pasagdan nga magbinugtong diha sa kagul-anan? Nag-way ba sila? Ordinaryo na lang ang panag-away sa managhigugmaay. Matod pa sa mga katiguwangan, lamas kini sa pagminahalay.
Lawom nang gabii nga mibalik ko sa hotel. Diha gihapon ang lalaki sa iyang nahimutangan. Ambot unsa na kahay naabtan sa iyang hunahuna sa taas nga mga gutlo sa iyang pag-inusara sa baybayon? Mitindog siya. Nakatan-aw siya nako. Nakahunong kog lakaw duol niya.
Mipakibo na lang ko sa akong mga abaga nga mipadayon paglakaw. Tingali nakadesisyon siya nga agpason ang iyang girlfriend sa sulod sa hotel. Nia sab diay sila sa hotel nagpalabay sa gabii.
“Nagbilin siyag sakit nga handomanan nako.”
Kalit kong nakalingi. Diha na sa akong tapad ang lalaki. Nakapangawot ko sa akong ulo. Ako ba ang iyang gisultihan? Naghilom ko nga mipadayon paglakaw.
“Maybe, wa na siya ron dinhi sa beach. Mibiya na.”
“Kay ngano man diay?” Na, nakatubag gyud ko sa lalaki nga sa akong pagtan-aw kaniya morag gustong mohilak.
(SUMPAYAN)